Sámediggepresideanta ja ovddeš Bargiidbellodaga politihkkár Vibeke Larsen lea vuođđudan ođđa sosiálademokratiijalaš listtu mas galgá Šiella namman.
– Mii leat molssaeaktovejolašvuohta Bargiidbellodahkii ja leat gávdnan nama, Šiella. Válljiimet Šiella nama dan sivas, go lea dovddus sápmelaččaide ja mearkkaša ahte lea suodjaleaddji dahje várjaleaddji, čilge Larsen NRK Sápmái.
Njealji válgabires
Ságat dieđuid mielde ásahuvvo listu njealji válgabires, Nuortaguovllu, Ávjováre, Viestarmeara ja Lulli-Norgga válgabiriin.
Marie Therese Aslaksen galgá leat leamašan mielde vuođđudeamen ođđa listtu.
Aslaksen lea dál sámediggeáirras Sámit lulde listtus ja son lea ovddeš Bargiidbellodaga politihkkár.
