-Almmuhus-
VALÁŠTALLANVulget vuoitinnammii Eurohpámeašttirgilvvuide

Vulget vuoitinnammii Eurohpámeašttirgilvvuide

-

-

Golbma Guovda­geainnu bártni leat lávvordaga gergosat gilvalit Eurohpámeašttirgilvvuin čáhce­crossas.
– Mihttu lea ­dieđusge vuoitit, in muđui oba vuolggáše ge, ­lohká Isak Adrian Eira.

Ihttin álget Eurohpámeašttirgilvvut čáhcecrossas, Jyväskyläs Suoma bealde. Golbma Guovdageainnu vuoddji leat kvalifiserejuvvon dohko, ja leat gergosat gilvalit.

 

Buoremusaid searvvis
24 vuoddji servet Eurohpámeašttirgilvvuide, gávccis leat norgalaččat. Dan gávcci searvvis leat Guovdageainnu bártnit Bjørn Ivar Henriksen Sara, Isak Adrian Eira ja Niillas Jovnna Länsman.
– Dál leat geasi divodan skohteriid, ja geahččalan daid oažžut mannat nu bures go vejolaš. Obbalaččat lean leamaš viđa buoremusa searvvis olles geasi, nu ahte dál áiggun geahččalit buoremussan šaddat. Mihttu han lea dieđusge golli, in muđui livčče gillen bidjat nu olu áiggi dasa go lean dahkan, lohká Isak Adrian Eira.

(ášši joatká gova vuolde)


GUHKES GEASSI: Olu áigi geasis lea mannan garášas divodit skohteriid.
Govven: Inger Marita Bals

 

Divrras astoáigedoaibma
Go Norggas orru ja vuodjá čáhcecrossa, de ii leat dušše skohter masa adno ruhta:

– Mannan vahkkoloahpa ledjen hárjehallame Heahtás, Suoma bealde, danne go Norgga bealde ii leat lohpi vuodjit skohteriin čázis. Dá lea dieđusge stuora lassigollun midjiide geat juo fertet vuolgit guhkás go galgat gilvvohallat. Unnán gilvvut lágiduvvojit dáppe davvin, muitala Niillas Jovnna Länsman.

(ášši joatká gova vuolde)

– Go lea ná stuora beroštupmi dása go mis lea, de ii bisset ruhta.

Bjørn Ivar Henriksen Sara

– Go lea ná stuora beroštupmi dása go mis lea, de ii bisset ruhta. Aŋkke lean hui giitevaš buohkaide geat dorjot min, ja veahkehallet, go sin haga gal livččii fártan váttisin čađahit dan maid dán geasi leat bargan, čilge Bjørn Ivar Henriksen Sara.

 

Eai ovddas seamma joavkku
Go skihpárat vulget vahkko­loahpa Supmii gilvvohallat, de leat ­gilvaleaddjit geain buohkain lea seamma mihttu; golli viežžat ­ruoktot. Isak Adrian ja Bjørn Ivar ovddasteaba WaterXross Racing Team, ja Niillas Jovnna fas Länsman Racing.
– Vaikko ovddastit goabbat ge joavkku, de leat ain skihpárat, ja veahkehallat nubbi nuppi jus dárbbašuvvo veahkki. Čáhcecrossa deaivvademiin lea hui buorre biras, mii dagaha ahte lea liikká somá searvat juohke háve, lohká Isak Adrian.

 

Stuora vuordámušat
Niillas Jovnna lea birgehallan hui bures dán geasi, beassan juohke gilvvu golmma buoremusa searvái. Danne árvvoštallá golli realisttalaš mihttun.
– Lean válbmen skohtera, hárjehallan ja lean muđui hui gearggus vahkkolohppii. Čáhcecrossas ii goasse dieđe mii geavvá, nu ahte ferte geahččalit nu bures go sáhttá, ja sávvamis lea dat golli, loahpaha son.

 

-Almmuhus-