– Mii vuolgit Osloi hehttet luondduroasu mii jávkada visot boazodoalu, vuotnaguoli ja luosaid jogas jus Nussir ASA oažžu dohkkehuvvot doaibmalobi, lohká Fieddara orohaga ovdaolmmoš Per Johnny A. Skum.
– Mii vuolgit Osloi hehttet luondduroasu mii jávkada visot boazodoalu, vuotnaguoli ja luosaid jogas jus Nussir ASA oažžu dohkkehuvvot doaibmalobi, lohká Fieddara orohaga ovdaolmmoš Per Johnny A. Skum.
Fieddara orohaga ovdaolmmoš Per Johnny A Skum áigu sihtat Ealáhus- ja guolástusdepartemeantta hilgut Nussir ASA ruvkedoaibmaohcamuša go čavge Osloi ráđđádallat stáhtain.
Bissehit luondduroasu
Boazodoalus lea okta áidna mihttu go galget čoahkkinastit departemeanttain boahtte bearjadaga. Dál áigot bissehit Nussira ruvkeprošeavtta mii lea áittan Fieddara boazodollui, Riehpponvuona guliide ja lussii mii gođđá Riehponjogas.
– Mun balan ahte ruvkedoaibma Fálesnuoris jávkada buot elliid mat leat váriin, seammás go boazodoallu ja vuotnaguolli jávká, ja okta dain buoremus luossajogain Norggas billahuvvá. Dat lea luondduroassu man áigut bissehit go ráđđádallat stáhtain Nussira ruvkedoaimma birra, lohká Skum preassadieđáhusas.
Ballet ruvkemirkkuid leavvamis
Nussir ASA lea ohcan doaibmalobi viežžat veaikki Nussira ja Gumppenjuni guovlluin, maŋŋel go Dálkkádat- ja birasdepartemeanta dohkkehii viidáset Birasdirektoráhta lobi, ahte Nussir ASA oažžu gurret ruvkebázahusaid merrii.
– Leat stuora váikkuhusat Fieddarii go veaikeruvkii lea min guohtun- ja guotteteatnamiin. Mii ballat ahte ruvkemirkkut girdet biekka mielde, golget jogaide ja jávrriide, ja mirkkohuhttet bohccuid ja min mánáid. Guohtuneatnamiid massimiid ii sáhte goassege buhtadit agibeaivái, čilge Fieddara orohatovdaolmmoš Skum.
Eai dárbbat ođđa Álttá-ášši
Ealáhus- ja guolástusdepartemeanta galgá meannudit ohcanlobi lagamus áiggi.
– Mii vuolgit eiseválddiid lusa dainna rávvagiin ahte Norga ii dárbbat ođđa Álttá-ášši. Ii leat dárbu álggahit ruvkedoaimma ovdal go teknologiija lea nu buorre ahte ii šat oba ge nuoskkit, lohká Per Johnny A. Skum loahpas preassadieđáhusas.
