Sámedikki ealáhus- ja kulturlávdegoddi vuolgá lávdegoddemátkái Lulli- ja Ubmisámi guvlui borgemánus.
Ulbmil mátkkiin lea oahpásmuvvat buorebut lulli- ja ubmisámeguvlui ja guovllu sámi kultur- ja giellaásahusaide/-organisašuvnnaide/-servviide, ja gullat ovdánahttinplánaid ja hástalusaid birra mat sis leat beaivválaš doaimmas.
Lávdegoddi háliida maiddái eanet gulahallama Lulli-Sámi boazoeaiggádiiguin áigeguovdilis areálasisabahkkenáššiid birra boazoguohtunguovlluin.
Lávdegoddi galga finadit sihke Snoases, Maajehjaevries, Trovvegarses, Aarbortes, Hïejmenaassjoes ja Muoffies. Snoases sii galledit Saemien Sijte, gos galget álbmotčoahkkima maid doallat.
Lávdegoddi galgá maiddái galledit Sjeltie, Sijti Jarnge, Åarjelsaemien vierhtiesåafoe, Hemnes Umesamisk forum, Åarjelhsaemien teatere ja Aernie. Dasa lassin lea sis dan mátkkis sierra čoahkkin Jillen-Njaarke orohagain, dieđiha Sámediggi preassadieđáhusas.
Golbma fágalávdegotti
Sámedikkis leat golbma fágalávdegotti mat ovddidit árvalusaid dievasčoahkkimii áššiin maid dievasčoahkkinjođihangoddi sádde lávdegottiide.
Ealáhus- ja kulturlávdegoddi bargá ealáhusdoaimmaiguin, nu go mátkeealáhusain, boazodoaluin, eanandoaluin, guolástusain ja bivdoeriiguin, lotnolasealáhusaiguin, oljjuin ja energiijain ja fievrridemiin ja infrastruktuvrrain. Kulturdoaimmat gullet maiddái lávdegotti bargosuorgái.
Seammá guoská girkui, kulturmuittuide ja birasgáhttemii. Dasa lassin bargá lávdegoddi guovllupolitihkain, regiovdnaplánemiin ja fylkkagielddaid ovttasbargošiehtadusaiguin.
