-Almmuhus-
OĐĐASATVulget gilvui njuovvanreŋkkuin

Vulget gilvui njuovvanreŋkkuin

-

-

Kárášjoga joatkkaskuvlla Teknihkka ja Industriija luohká nuoraidfitnodat, Reŋko UB , galget gilvalit «Ungt Entreprenørskap» Fylkkameassuin dán mánu gaskamuttus.

Gávdnojit ollo iešguđetlágaš buktagat go Finnmárkku nuoraidfitnodagat čájehit iežaset čehppodaga duopmáriidda ja álbmogii «Ungt Entreprenørskap» Fylkkameassuin dán mánu 18. beaivvi Álttás. Fylkkameassu lágiduvvo Altahallenis, ja dohko galget 221 oahppi čájehit iežaset fitnodagaid vuovdinbevddiin ja lávddi nalde ovdanbuktit ja vel jáhkihit duopmáriid jearahallamiin.

 

Geahpidivčče njuovvama

Kárášjoga joatkkaskuvlla teknihkka ja industriija luohká nuoraidfitnodat, Reŋko UB leat hutkan njuovvanreŋko.

– Min fitnodat buvttada njuovvanreŋko, maid sáhttá máhcastit oktii. Das lea maid loktenrusttet, mii galgá geahpidit goruda loktet reŋko nala. Jurdda buktagii lea boahtán go ieš lean leamašan njuovvi ja lean bargan boazodoalus, ja de bođii jurdda iigo son gávdnošii buoret reŋko mii maid álkidivčče njuovvama, lohká oahppi ja fitnodaga gulahallanolmmoš Nils Samuel Anti.

 

Buorre buvtta

Anti lohká sin iežaset mielas gal lea dát reŋko buorre buvtta, ja sávvá sii besset viidáseappot Fylkkameassuin.

– Doppe leat dieđusge ollu fitnodagat mat leat mielde, muhto jus vuoittit, de beassat viidáseappot Norggameašttirgilvvuide go olles riika nuoraidfitnodagat gilvalit, lohká Anti.

 

Vejolaš joatkit

Anti muitala go skuvlajáhkki nohka, de galgá fitnodat heaittihuvvot, muhto jus lihkostuvvá bures ja lea jearru buktagii, de lea vejolaš joatkit ja viidáseappot bargat maŋŋel skuvlajagi.

– Mii beassat ge dál oaidnit Álttás leago dat buorre buvtta ja leago dakkar mainna gánnáha bargat viidáseappot.

 

Movttiidahttá ohppiid

Beaivválaš jođiheaddji Finnmárkku «Ungt Entreprenørskap» Randi Gjevestad Vorren, lohká dat movttiidahtti ohppiid.

– Olusat atnet eahkediid ja vahkkoloahpaid bargat iežaset fitnodagaiguin, ja Fylkkameassuin hukset mii báikki gos nuorat besset čájehit bohtosiid bargguineaset fágaolbmuide bargo- ja ealáhuseallimis. Das lea maiddái gilvoáhta mii hástala ohppiid bidjat liigenávccaid bargui, lohká Gjevestad Vorren.

 

 

 

 

 

-Almmuhus-