Sámemusea Siida ja SámiSoster rs lágidit giliturnea man ulbmilin lea guldalit sámegiliid olbmuid sávaldagaid ja dárbbuid.
Sámemusea Siida ja SámiSoster rs lágidit sámeguovllus oktasaš giliturnea dán mánu.
– Mannan čavčča ávvuduvvui, go viiddes sámečoakkáldat máhcai ruoktot. Čoakkáldaga máhcaheami, ođđa čoakkáldatovttadaga ja Sámemusea ja Luondduguovddáš Siidda vuođđodivvuma geažil lea vejolaš dahkat ođđalágan searvvušlaš čoakkáldatbarggu ja dávvirdutkamuša. Daid olis háliidit gullat servoša oainnuid boahttevuođa čoakkáldatbarggus., čállá Sámemusea Siida preassadieđáhusas.
Sámemusea Siida čilge ahte giliturnea ulbmilin lea guldalit servoša sávaldagaid ja dárbbuid boahttevuođa searvvušlaš barggus, ovdanbuktit Sámemusea Siidda doaimmaid ja muitalit Sámemusea ja Luondduguovddáš Siidda viiddideami ja vuođđodivvuma bokte šaddan vejolašvuođain.
Dilálašvuođain čájehit maid boares govaid, maidda sávvet oažžut olbmuin veahki dovdat olbmuid ja báikkiid.
Turneas johtet giliin čuovvovaš ortnega mielde áigodaga 16.3-17.4.22: Vuohčču, Čeavetjávri, Heahttá, Gárasavvon, Njellim ja Ohcejohka.
