Sámi váhnemat Álttá gávpogis áigot ihttin vuolgit ráđđevissui gos politihkkáriin lea čoahkkin, čájehan dihte sii eai vuollán mánáidgárdeáššis.
Sámi váhnemat Álttá gávpogis áigot ihttin vuolgit ráđđevissui gos politihkkáriin lea čoahkkin, čájehan dihte sii eai vuollán mánáidgárdeáššis.
– Lean ávžžuhan buohkaid boahtit, sihke váhnemiid ja earáid geat beroštit áššis. Mii háliidit čájehit mii leat ain dás ja mii eat vuollán, dadjá váhnen Inga Laila Sara.
Inga Laila Sara jahkásaš nieiddaš lea okta dan 17 mánás geat vurdet beassat áidna sámegiel mánáidgárdái, Álttá Siidii, gos olu jagiid juo lea leamaš guhkes vuordinlistu.
Hilgon máŋgii
Álttá siida livččii mannan čavčča juo leamaš gearggus viiddidit mánáidgárddi, muhto suohkan hilggui geasset sin ohcamuša. Bušeahttašiehtadallamiin hilgo sin nuppes, eai ge vuoruhan ruđa.
Sara lohká sávvat ahte ihttáš čoahkkin Álttá suohkana bajásšaddan- ja kulturáššiid váldolávdegottis lea juogaládje ávkin.
– Mun sávan dat dorjot dál min, ja rahpet ođđa ossodaga Álttá siidii. Jus dan eai nagot, de sávvat oažžut čielga sámi ossodaga eará mánáidgárdái, gos leat sámegielat bargit ja sámegielat mánát, dadjá Sara.
Ii bija dárogielat mánáidgárdái
Son ii loga sáhttit bidjat máná dárogiel mánáidgárdái ja váldá baicca virgelobi barggus orrut suinna ruovttus.
Son lea okta dan máŋgga váhnemis geat dál leat garrasit oččodišgoahtán jođu áššái. Sii leat čállán reivviid, muhto eai oaččo vástádusa politihkkáriin, ii sátnejođiheaddjis Monica Nielsenis eai ge lávdegotti jođiheaddjis Hilde Søraasas.
Dušše diehtojuohkin
Bearjadaga čoahkkimis ii leat dát ášši eambbo diehtojuohkináššin, ii ge galgga mearriduvvot doppe mihkke. Muhto Gurutbellodaga Trine Noodt, gii suohkanstivrras lea unnitlogu bealde ja veahkkin dál oččoda lassi sámi mánáidgárdesajiid, jáhkká das ávkki vaikko ii leat eambbo diehtojuohkin, go bušeahtta galgá divoduvvot miessemánus.
– Lea sáhka dáhtus. Álttá suohkanis livčče buot láhččojuvvon gárvvisin jus oba dáhtošedje ge lasihit sámi mánáidgárdesajiid, dadjá son Ávvirii.
Noodt moaitá dan movt Áltá lea atnán golbma miljovnna maid ráđđehus juolludii ođđa mánáidgárdesajiide. Sátnejođiheaddji Monica Nielsen ii lean gávdnamis ságaide, muhto muitala NRK:ii sii leat atnán ruđa resursapedagogaide, rusttegiidda ja dávviriidda ja lasihan pedagogaid mánáidgárddiide ja sihkkarasten birrajagi doaimma muhtin mánáidgárdái.
Leat dorjon ášši
Gieskat lei Álttá mánáidgárdeášši maiddái Stuoradikki gažadanbottus go stuoradiggeáirras Helga Pedersen (Bargiidbellodat) hástalii máhttoministara Torbjørn Røe Isaksena juolludit eambbo ruđa sámi mánáidgárdái. Røe vástidii son ávžžuha suohkaniid ja váhnemiid bures ovttasbargat láhčit buori mánáidgárdefálaldaga.
Mánáidgárddiid váhnenlávdegoddi (FUB) maid ávžžuha reivves Álttá sátnejođiheaddji váldit vuhtii váhnemiid ja ohcat buriid ja bistilis čovdosiid áššái. Sii muittuhit mánáidgárdelága mielde lea suohkana ovddasvástádus sihkkarasit ja ovddidit sámegielat mánáid giela ja kultuvrra. Maiddái ON mánáidkonvenšuvnnas doarju mánáid rievtti beassat doalahit iežaset identitehta, čállet sii.
