Dál sáhttá dás šaddat politiijaášši.
Dál sáhttá dás šaddat politiijaášši.
Ávvira dieđuid mielde galggai tráktorvuoddji fievrredit fielluid nuppe beallái joga, vai beassá daiguin cahkkehit mihcamárdola. Muhto tráktor bisánii oktan gurpmiin johkii. Dasto fertii bivdit stuora mašiinna veahkkin, mii vujii johkagáddái ja gaikkui tráktora fas goikásii.
Tráktorvuoddji bidjalii gova tráktoris Finn.no:ii, mii lea Norgga stuorimus neahttagávpi.
“Tráktor oktan goallosvovnnain árvvoštallo vuvdot. Vuvdo nugo lea!! Fála hatti…”, čállá vel
Garra ráddjehusat bievlavuodjimis
Muhto vuoddji ii dáidán jurdilan visot váikkuhusaid. Go dákko, meahcceráigge ja rastá joga, ii leat dieđusge lobálaš geaidnu, ja rehkenasto bievlavuodjimin. Dasa adno sierralohpi Fylkkamánnis.
Lea oainnat nu ahte miessemánu 5.beaivvi rájes gitta geassemánu 30.beaivvi rádjai lea oalát gildon vuodjit bievlaeatnamiin. Suohkanat eai beasa dan áigodahkii juohkit vuodjinlobiid, ja buot galgá Fylkkamánni dohkkehit.
(Geahča video vuolábealde ášši, das lea jietna čuhppon eret)
Dát dáhpáhus lea dáhpáhuvvan Bieskkenjárgga guovllus, mii lea guokte miilla Kárášjoga márkanis. Lobálaš biilageaidnu gal guorada Kárášjoga Bieskkenjárgga meaddel. Guovllus leat logenáre viesu, muhto ášši ii dárbbaš sidjiide guoskat, go ollu olbmot ledje mehciin mihcamáreahkeda.
Ii leat addán lobi
Finnmárkku fylkkamánni ossodatjođiheaddji Margareth Wegner Sundfør ii loga ovttage ohcan dien guvlui ja dan áigodahkii bievlavuodjinlobi.
– Kárášjogas leaba guovttes ohcan beassat huksenávdnasiid fievrredit bartii 22.beaivvi geassemánu. Dan ohcamuša hilgguimet. Muđui lea Kárášjoga gielda ohcan beassat vuodjit čuoiganlahtu guora njáskat muoraid. Dan maid hilgguimet. Muđui eai leat eambbosat ohcan bievlavuodjinlobi Kárášjoga gielddas, muitala Sundfør.
Sundfør lohká galgat leat erenoamáš ágga jus galgá oažžut sis vuodjinlobi dán áigodahkii.
– Jus oktage rihkku lága, de lea dieđusge politiijaášši, dadjá son ja lasiha ahte dieđusge sáhttá leat eará ášši jus leat lobálaš huksemat main lea lobálaš regulerenplána ja nu ain.
Kárášjoga gieldda sadjásaš teknihkalaš hoavda Helge Nystad ii loga sin dieđu mielde gal leat makkárge huksemiid Bieskkenjárggas dál main geavahit stuora mašiinnaid.
Ohcala eambbo dieđuid
Kárášjoga leansmánni Kjell Magne Grønnli, ii loga sin álggahan ášši dán dáhpáhusa vuođul, muhto vihku ahte dás orrot vuodján lobiheamet.
– Go mii oažžut eambbo dieđuid, de ráhkadit das ášši. De gohččut sisa sin geat galget vuodján, ja de dutkat mii lei ulbmil. Dasto sáhttá jurista geahčadit ášši ja árvvoštallat leago láhkarihkkun. Sáhttá sáhkkohallat jus lea lobiheamet vuodján, dadjá Grønnli.
Finn.no – almmuhus lea dál váldon eret neahtas.
Ávvir ii ožžon ságaide tráktorvuoddji, vaikko máŋgii leat geahččalan riŋget ja maid čállit dieđu.
