Ella Marie Hætta Isaksen lea vuoitán bálkkašumi go barggus bokte ovddida sámevuođa.
2022 Zola-bálkkašupmi geigejuvvo sámi artisttii ja servodatberošteaddjái Ella Marie Hætta Isaksenii. Bálkkašupmi juhkkojuvvo jahkásaččat ja geigejuvvo eaŋkilolbmuid guhte rahčá vuoiggalašvuođa, olmmošvuoigatvuođaid ja demokratiija ovddas.
Zola-stivrra mielas lea Ella Marie duostil ja son čađaha erenomáš buori barggu Norgga servodagas.
– Isaksen lea nana sámi ambassadevra ja son atná iežas ovddasvástádussan gaskkustit sámevuođa majoritehtaálbmogiid. Son lea čalmmustahttán man láhkai dáruiduhttin lea čuohcan sámi gillii ja kultuvrii, ja makkár váikkuhusat das leat sápmelaččaid árgabeaivái, lohká Zola stivrajođiheaddji Karl Eldar Evang preassadieđáhusas.
(©NTB)
