Buvrovuotnalaš Daniel Boberg Leirbakken vuittii Bingesrittet dievdoluohká goalmmát jagi maŋŋálaga, buoremus áigái dán rádjai.
Buvrovuotnalaš Daniel Boberg Leirbakken vuittii Bingesrittet dievdoluohká goalmmát jagi maŋŋálaga, buoremus áigái dán rádjai.
Otnáš Bingesrittet sihkkelgilvvu sihkkelvuoiti lei oahpes ja čielga favorihtta. Buvrovuona valáštallansearvvi Daniel Boberg Leirbakken bođii mollii áigái 1:38:07 ja lei guokte minuvtta ovdalis nuppi Odd Peder Wang-Norderud.
Bohtosat mat leat sekunddaid alde, leat almmuhuvvon maŋŋel gaskaija.
Goalmmádin lei ges Stig Misund. Daniel Boberg Leirbakken lei njunnošis measta čađat, ja álggos golbma vuosttaža gaiko vurrolaga, dahje sihkkelastejedje ovddemusas. Suopmelaš gii bođii njealjádin bisánastii moallalinjá duohke, luoitit goalmmát saji vuoiti meaddel, go ii lean ieš sihkkelasten ovddemusas.
– Leimmet viđas álggos fárrolaga vuosttaš luohkáin. Dađistaga leimmet de njealjes, mii golmmas ja vel okta suopmelaš. Muhto son bázii Bingesa davábealde. De ožžon vehá gaskka daidda earáide, ja šaldis Bingesa davábealde de gal ledjen okto ovddemusas, muitala son.
Vuoitá visot
Boberg Leirbakken lea dán jagi juo vuoitán Offroad Finnmark 300, Lavkarittet Romssa fylkkas, mii lea Davvi-Norgga stuorimus meahccesihkkelastin. Son vuittii Hámmárfeastta sihkkelgilvvuid ja Nordlysrittet Álttás oktiibuot
Ferte leat gievra
Vuoiti lohká Bingesrittet leat gilvun mas ferte leat gievra duolbmut.
– Dát gilvoluottas lea čievra ja danne ferte gievra duolbmut. Ii adno nu olu teknihkka nugo dain eará gilvvuin. Ii sáhte šat šaddat buoret dálki ge go dál, goikkis ja buorre, dadjá son.
Tina Idström sávrrimus nieida
Suoločielggi nieida Tiina Idström (27) Suomas vuittii ges nissonluohká, áiggiin 1.55.42.
– Mun sihkkelastejin okto eanas áigge, ja dat gal lei lossat. Lei hui báhkka maid, muhto lei somá sihkkelastit. Lea vehá earáládje go Suomas, dáppe manná nu jođánit ja lea čáppa luondu, dadjá son gii maid gilvvohallá measta buot vahkkoloahpaid sihkkeliin.
Teknihkalaš sivaid geažil, eai almmuhan lágideaddjit bohtosiid ovdal maŋŋi eahket sotnabeaivvi. Vuosttaš njealji vuoiti áiggiid eai diehtán sihkkarit ovdal eahkes.
