-Almmuhus-
OĐĐASATVuittii V75 gilvvus 100 000 ruvnnu

Vuittii V75 gilvvus 100 000 ruvnnu

-

-

Seppo Härkönen heasta Punktum Skalflex vuittii odne V75 gilvvu Norgga váldo doalvešilljus Bjerkes.

Odne vuittii Gáregasnjárgalaš Seppo Härkönen heasta Punktum Skalflex, mii lea máddin hárjehallamis, V75-5 gilvvu, mii lei «Per Ulvens æresløp» ja mas lei 100 000 ruvnnu vuosttaš vuoitu. Punktum Skalflex vujii Kai Johansen ja heasta hárjehallá Bo Westegård.

 

Vuosttaš V75

Dán vahkkuloahppa ledje stuorra gilvvut Bjerke doalvešilljus, gos earet eará Norgga buoremus nuorra heasttat gilvaledje ja ledje stuorra doalut gilvvuid oktavuođas.

Kai Johansen lei erenomáš ilus go Punktum Skalflex viimmat nagodii vuoitit ja dát lei heastta vuosttaš V75 vuoitu.

 – Mun lean diehttán ahte son lea buorre, muhto ii leat lihkostuvvan vuoitit, dajai son jearahallamis dakka maŋŋel vuoittu Rikstoto njuolggosáddagis.

 

Ilus vuoittus

Johansen dadjá heastta leat erenomaš, go sáhttá mannat buot gilvomátkkiid ja odne vuittii son 3120 mehtera gilvvu.

 – Heasta dahká álo buoremus lági mielde gilvvus ja lean dadjan čađat ahte Punktum boahtá vuoitit gilvvu farga ja lean hui movtta eaiggáda bealis, dadjá Johansen Rikstoto sáddagis.

Kai Johansen rámida go Seppo Härkönen lea nu garrasit vuoruhan doalveheasttaide.

 – Lean vuodján Seppo ovddas ovdal. Son lea gávppašan ollu heasttaid, muhto in jáhkke ahte lea oaidnán ovttage. Son čohkká ruovttus ja geahččá gilvvuid tv:s ja jáhkkan otná vuoitu lea stuorámus sutnje dán rádjai, muitala Johansen jearahallamis Rikstoton.

 

Bures birgen

Härkönen osttii Punktum Skalflex skábmamánus 2012:s Danmárkkus, mii vuittii vuosttaš gilvvu maŋŋel go bođii Norgii ja vuittii vel nuppi gilvvu miessemánus 2013:s, muhto ii leat vuoitán dan rájes.

Giđđa dálvvi dan jagi sirddii Härkönen heastta dánskalaš Bo Westegård hárjehallamii ja lea birgen bures maŋimuš gilvvuid.

Golmma maŋimuš gilvvus bođii Punktum Skalflex nubbin ja maŋimuš gilvvus časkkahalai moallasárgas. Dan ovdal bijai heasta ođđa olahusa ja doalvvistii 11,9 kilomehteráiggiin.

 

Ávvir ii fáhten heastaeaiggáda Seppo Härkönena ságaide.

 

 

 

-Almmuhus-