-Almmuhus-
-Almmuhus-
-Almmuhus-
Featured box1Vuittii stuora biebmo­bálkká­šumi

Vuittii stuora biebmo­bálkká­šumi

-

-

Máret Rávdná Buljo rámiduvvo barggu ovddas go dokumentere ja áŋgiruššá doalvut sámi biebmokultuvrra viidáset. – Dat lea máhttu movt geavahit ávdnasiid ja ceavzilisvuohta maid olles riika sáhttá ávkkástallat, dajái eanandoallo- ja biebmominsttar Olaug Bollestad go geigii bálkkašumi Buljoi.

Buohkat čuoččohedje ja doško gieđaid go eanandoallo- ja biebmominsttar Olaug Bollestad almmuhii Máret Rávdná Buljo dán jagáš vuoitin Ingrid Espelid Hovig biebmokulturbálkkašumis.

Gaskavahku almmuhuvvui ahte Máret Rávdná Buljo lea ožžon buot eanemus jienaid dan gilvvus mas olbmot sáhttet jienastit su gii ánssáš oažžut dán biebmobálkkašumi.

Vuoiti njuorrasii go lávkii lávdái

Dan stuora bálkkašumi geigen lei Matmerk fágabeaivvi vuođđudeami oktavuođas. Ledje máŋga dovddus nama evttohuvvon bálkkašupmái.

Buljo lea historjjálaš vuoiti. Son lea vuosttaš geas lea sámi duogáš, ja lea nuoramus vuoiti dán rádjái. 

– Mii dárbbašit máhtu

– Vuoiti lea gierdevašvuođain ja áŋgiruššamiin gávdnan dološ vugiid  ja teknihkaid movt ráhkadit ja vurket luonddu biebmoávdnasiid, lohká bálkkašumi jođiheaddji Liv Gregersen Kongsten.

Máret Rávdná Buljo oaččui lihkosávaldagaid Ingrid Espelid Hovig biebmobálkkašumi jođiheaddji Liv Gregersen Kongsten:as. Govven: Matmerk.
Máret Rávdná Buljo oaččui lihkosávaldagaid Ingrid Espelid Hovig biebmobálkkašumi jođiheaddji Liv Gregersen Kongsten:as. Govven: Matmerk.

– Dat lea máhttu mii midjiide sáhttá leat ávkin, biebmoávdnasiid geavahusa buoridit ja loktet ávdnasa gánnáhahttivuođa. Norga dárbbaša eanet áŋggirdeddjiid nu go son lea, lohká Kongsten.

Buljo lea Guovdageainnus eret, muhto ássá dál Lodegis gos ovttas isidiin jođiha Boazovázzi guovddáža. Buljos lea stuora beroštupmi čohkket máhtu mii ii leat čállon gosage.

Son lea árben vuođđomáhtu bearrašis, muhto lea maid vuorrasiin gulahallan vai sihkkarastá máhtu ođđa buolvvaide. 

– Ballá dehálaš máhtu jávkat

– Das lea stuora mearkkašupmi munnje ahte biebmu mainna barggan ja man ovddas áŋgirušan oažžu dakkár ánssášumi, dajai Máret Rávdná Buljo gii lei njuorrasan go oaččui dán bálkkašumi.

– Munnje lea dehálaš čohkket máhtu danne go balan ahte mii massit min árvvu. Máhttu jávká, ja dat manná nu jođánit. Dat deháleamos lea ahte dat ii jávkka midjiide, go lea olu máhttu dehálaš fáttáin mas lea ceavzilvuohta birra sámi kultuvrras. Dat lea máhttu maid sáhttit ávkkástallat, lohká Buljo.

Máret Rávdná Buljo lea dutkan árbevirolaš vugiid movt lunddolaččat sáhttá konserveret biepmu, ja bargá dokumenteremiin movt sáhttá vurket biepmu guhkit áiggi badjel go bargá ovttas luondduin ja dálkkádaga ektui.

Eanet áiggi beassat dutkat 

Su beroštupmi lea maid atnit ávkki olles eallis, mii lea ceavzilis jurddašanvuohki mii ii leat ovdal leamaš nu áigeguovdil go dál. Buljo lea oahppan dološ njuovvanvugiid, ja movt buot beliin gorudis lea geavahusárvu.

– Dađi eanet mun oahpan min biebmovieruid birra, dađi eanet ipmirdan makkár hirbmat máhttoriggodat min máttuin lea leamaš biepmu birra, ceavzilvuođa birra ja máhttu movt biebmu lea dálkkasin. Dat lea dutkanveara, ja sávan eanet áiggi ja vejolašvuođa bargat dainna, lohká son.

Giittá buohkaid geat leat su jienastan gilvvus mii lei neahttasiiddu bokte. Govven: Biret M Buljo
Giittá buohkaid geat leat su jienastan gilvvus mii lei neahttasiiddu bokte. Govven: Biret M Buljo

Buljo lea ovdalaččas vuoitán Sápmi Awards, ja sus lea leamaš guovddáš rolla TV-ráiddus «Smaker från Sápmi», mii čájehuvvui sihke SVT ja NRK:s diibmá. 

Ollu dovddus namaid searvvis

Ingrid Espelid Hovigs Matkulturpris lea 30 000 ruvnno, ja geigejuvvo jahkásaččat sutnje gii lea fuomášumi ožžon biepmu ovddas, dearvvašlaš borramuša ja biebmokultuvrra ovddas mas deattuhuvvo Norgga biebmu.

Ledje vihtta dovddus nama evttohuvvon bálkkašupmái dán jagi. Trine Sandberg jođiha Norgga stuorimus biebmoblogga Trines mat. Gievkkanhoavda Heidi Bjerkan geas lea Credo restoráŋŋa Tråantes. Mat fra Norge redaktevra Per Borglund. Viessogohkkenoahpaheaddji ja biebmogaskkusteaddji Kari Støfringsdal.

Máret Rávdná Buljo oaččui eanemus jienaid jienasteamis gilvvus masa olbmot sáhtte searvat. Son oaččui 5135 jiena, ja ledje ollislaččat 12 649 jienasteami gilvvus. Stivra maid doarju ollislaččat su leat dán jagáš vuoitin. Lea 26 jahki go bálkkašupmi geigejuvvo. Earát geat leat vuoitán dan leat Arne Brimi, Andreas Viestad, Wenche Andersen, Bodil Nordjore ja Henry Notaker.

Dás oainnát filmma go Máret Rávdná Buljo oažžu bálkkašumi. Filmma lea Biret M Buljo filbmen ja luoikan Ávvirii.

warning: No Render Function for type [social-media] expect [render_social-media]

-Almmuhus-