Lulli-Sámi artista vuittii lávvordaga spellemannbálkkášumi.
Lulli-Sámi artista Marja Mortensson vuittii Spellemannbálkkašumi álbmotmusihka ja árbevirolašmusihka suorggis «Mojhtestasse» skearruin.
Mortensson lea jáhkkimis guđát sápmelaš gii vuoitá Spellemannbálkašumi, dan rájes go dat bálkkašupmi álggahuvvui 1973:s.
Su ovdal lea ožžon Mari Boine Spellemannbálkkášumi njealje geardde.
Dakko bokte lea maid dat sápmelaš gii lea dávjjimusat vuoitán Spellemannbálkkašumi.
Maŋemus vuittii Boine dan 2017:s
Bárut joavku, mas Inga Jusso lei njunuš, lea maid vuoitán Spellemannbálkkašumi 2011:s rabas luohkás skearruin «Bálggis», man Frode Fjellheim lea buvttadan.
Unjárgga joavku, The BlackSheeps, vuittii 2008:s dan Spellemannbálkkašumi suorggis «Dán jagáš hit-lávlla», lávlagiin «Oro jaska beana».
Frode Fjellheim vuittii bálkkašumi rabas luohkás 2004:s, «Aejlies Gaaltije — The Sacred Source» skearruin.
Niko Valkeapää vuittii 2003:s rabasluohkás Spellemannbálkkašumi iežas vuosttaš skearruin mas lea namma «Niko Valkeapää».
Valkeapää lei vel 2012:s maid nammaduvvon Spellemannbálkkašumi vuoitit, muhto ii ožžon dan.