John Inge Eira vuittii «Fischeriin» heargesprintagilvvu mii lei Mázes ikte.
Dán čállá Altaposten neahtas.
_ Lei hirbmat suohtas. Mu boares heargi «VISA» lea ollu vuoitán máŋggaid jagiid badjel, muhto lea vuosttaš geardde go «Fischer» lea mielde almmolaš gilvvus máilmmicupas heargevuodjimis. Ođđa herggiin vuoiti lea hui erenoamaš, muitala movttegis vuoddji John Inge Eira Altapostenii. Ii lean ollu mii earuhii dan golmma buoremusa A-finálas, ja doaivumis livčče Anne Risten Sara vuoitán iežas herggiin «Raidna» jus láhttu livčče guhkit. Su heargi nagoda jođanit ruohttat go láhttu lea guhkki. Dan lea čájehan go máilmmicupa lea vuoitán buoremus áiggiiguin.
Vuittii máilmmicupa
Anne Risten Sara vuittii obbalaččat máilmmicupgilvvuid su herggiin «Raidnain».
– Munnje lei dehálaš vuoitit máilmmicupa, ja dainna lean lihkostuvvan. Áinnas livččen hálidan vuoitit maŋemus gilvvu maid, muhto «Raidna» lea buoremus go kilomehtera ruohttá, go oanehis láhttu ruohttá. Son dárbbaša vehá áiggi ovdal šadda buorre leahttu, ja easka 400-500 mehtara maŋŋel lea jođaneamos. Muhto de lea ge son maid hui buorre, lohka Anne Risten Sara, gii vuittii 20 000 ruvnno máilmmicupas vuosttaš sajiin.
