Jussi Isokoski vuittii Áillohaš-bálkkašumi dán jagi.
Sámi Grand Prixas almmuhuvvo juohke jagi Áillohaš-bálkkašumi vuoiti.
Dán jagi vuittii Jussi Isokoski bálkkašumi. Isokoski bargá musihkain ja doaimmaha Tuupa Records skearrofitnodaga. Jury čilgii ahte Isokoski lea bargan olu sámemusihka ovddas go lea ovttasbargan nuorra artisttaiguin dego Ailu Vallein, Niillas Holmbergain, Sombyn ja nu ain. Isokoski ieš ii lean lahkage vuordime ahte vuoitá Áillohaš-bálkkašumi
– Lei hirpmástuhtti ja lean dieđusge hui ilolaš dál. Dákkáriid gal in lean heađisge vuordime, lohká son
– Gudni
Su mielas lea stuora gudni oažžut bálkkašumi.
– Mearkkaša olu. Lean bargan olu sámi musihkain ja munnje lea somá go earát oidnet barggu mii bargat. Dát addá movtta bargat ain viidáseappot sámi musihkain, dadjá Isokoski
Diibmá vuittii lávlu Sofia Jannok dán bálkkašumi mii lea geigejuvvon sámi dáiddáriidda 1993 rájes, dalle geigejuvvui dat Mari Boinii.
