Čakčamánus leat čiežanuppelogis duššan johtolagas. Trygg Trafikk ávžžuha olbmuid vuodjit várrogasat.
Trygg Trafikk logut čájehit ahte čiežanuppelogis leat duššan johtolagas čakčamánus.
Dát lea beali eanet go diibmá seamma áigodagas.
Dasa lassin leat oallugat garrasit roasmmehuvvan lihkohisvuođain.
– Oaidnit dađi bahabut ahte lohku lea lassánan diimmážis. Okta olmmoš gii duššá johtolagas lea okta olmmoš beare olu, ja lea ain guhká ovdal go olahit áigumuša ahte ii oktage galgga roasmmehuvvat ja duššat johtolagas, lohká Trygg Trafikk seniorráđđeaddi, Bård Morten Johansen.
Várut njalka luottain
Dávjá molsašuvvá dáid áiggiid dálki – vuollegis báikkiin lea biegga ja arvi ja váriin fas muohta.
Eambbo johtolat ja čakčadálki dagaha ahte lihkohisvuođavárra lassána.
– Muitte fal ahte sáhttet njalka luottat go manat meahccái. Vuosttaš maid berret dahkat lea molsut dálvejuvllaide. Váldde gulul ja leage áicil johtolagas, ávžžuha Johansen.
Heajos dálki ja sevdnjes eahkedat dagahit ahte ii leat nu buorre coakci ii ge oainne nu guhkás go dábálaččat.
Dat dagaha ahte vuoddji ferte ain eambbo áicil leat, ja ahte vázziolbmot fertejit geavahit šleđggoniid ja čuovggaid váccidettiin.
– Njuoska ja njalka luottat dagahit ahte goahcanguhkkodat šaddá njealje geardde guhkibun go goikeluotta alde. Danne lea dehálaš ahte vuoddjit oidnet vázziolbmuid ja sihkkelastiid buori áiggis. Buohkat, geat vánddardit olgun seavdnjadin, berrejit geavahit sleđggoniid dahje čuovggaid, lohká Bård Johansen.
©NTB
