Njukčamánu el-rávdnjerehket lei alimus dásis 2013 ektui. Dál leat kundarat miehtá Norgga ožžon elrávdnjerehkegiid mat leat mealgat badjelis go dábálaččat.
Njukčamánu el-rávdnjerehket lei alimus dásis 2013 ektui. Dál leat kundarat miehtá Norgga ožžon elrávdnjerehkegiid mat leat mealgat badjelis go dábálaččat.
Dát haddegoargŋun lea seamma buot guovlluin Norggas, ja sivvan dasa lea go ii leat arvan nu ollu dán áigodaga, mii dagaha ahte čáhcerávdnjeprodukšuvdna ii leat nu allat ge.
Seammás lei njukčamánus buolaš miehtá Norgga, ja elrávdnjegeavaheapmi lassánii, čállá Ishavskraft preassadieđáhusas.
Olgoriikkas viežžan elrávnnji
– Mii oaidnit ahte lei alladeaddu miehtá Davviriikkain njukčamánu, mii attii buollaša ja stabiila dálvedálkki. Gaskamearálaččat lei temperatuvra measta njeallje gráda buollašet go dábálaččat, mii dagahii ahte kundarat maid geavahedje eanet elrávnnji go muđuid dahket. Go geavahuvvo eanet elrávdnji, de lassána maid neahttaláigohaddi, mii fas váikkuha loahppasupmiide, muitala elravdnjefitnodat.
Diimmá njukčamánu ektui lei logi proseantta alit elrávdnjegeavaheapmi Norggas, ja láve dábálaččat badjebáza elrávnnjis, muhto elrávdnjefitnodagat leat importeren elrávnnji Duiskas vai nagodit gokčat dárbbu.
Eai oainne nu ollu arvvi vel
Čáhcemagasiinnat váriin guorranit dás ovddos guvlui, ii ge leat dieđihuvvon nu ollu arvi. Dat mielddisbuktá ahte šaddet vuot cuoŋománu viežžat olgoriikkas elrávnnji, ja hatti ektui vurdo šaddat seammá dásis go njukčamánu haddi.
Go muohta suddagoahtá, de vuordit hatti njiedjat 10-12 evrriin. Daidda kundariidda geat leat čatnan hatti, ii váikkut dát rievdadus.
Ishavskraft ávžžuha olbmuid váldit oktavuođa jus dárbbašat juohkit elrávdnjerehkega, dieđihit sii preassadieđáhusa bokte.
