Dán vahkku álgá Norgga stuorámus skuvlii-vázzin-akšuvdna go 40 000 skuvlamáná galget čakčamánus gilvalit birasseasti vugiin joavdat skuvlii. Finnmárkkus leat 14 skuvlla mielde vázzinkampánjas.
Dán vahkku álgá Norgga stuorámus skuvlii-vázzin-akšuvdna go 40 000 skuvlamáná galget čakčamánus gilvalit birasseasti vugiin joavdat skuvlii. Finnmárkkus leat 14 skuvlla mielde vázzinkampánjas.
«Beintøft» lea kampánja namma mainna Miljøagentene háliidit boktit birasberoštumi ja fuomášumi makkár birasváttisvuođat leat go geavaha biilla skuvlii manadettiin ja lagasbirrasis.
Go manná skuvlii birasseasti vugiiguin, de unnu áibmonuoskkideapmi ja CO2 nuoskkideapmi maid biillat luitet. Johtolagas unnot várálaš dilit, ja mánát leat vuokŋáseappot oahppat skuvllas.
«Beintøft» lea riikkaidgaskasaš kampánnja man Miljøagentene, Loop Miljøskole ja Syklistenes landsforening lágidit ovttas.
Birasválljen boahtteáiggis
Miljøagentene oaivvildit mánáide leat dehálažžan oažžut vejolašvuođa váikkuhit rávisolbmuid bargat riekta árgabeaivvis.
– Mii sávvat ahte mánát ieža galget beassat mearridit movt sii háliidit mannat skuvlii. Dainna lágiin sáhttet leat mielde rávisolbmuid váikkuheame, ja oidnet go eambbogat barget veahkkálaga, de lea buoret birrasii, lohká birasageantta gulahallanovddasvástideaddji Rasmus Norsted.
18 geardde máilmmispáppa birra
Beintøft kampánjas mihtiduvvo man guhkás oahppit vázzet, sihkkelastet ja mátkkoštit kollektiivvalaččat skuvlii. Diibmá johte oasseváldit oktiibuot badjelaš 720 000 kilomehtera, mii lea dego 18 geardde eananspáppa birra.
– Ollu váhnemat vuojihit mánáideaset skuvlii, eai ge jurdil dađi duobbelii váikkuhusaid birra. Go 40 000 váhnema diktet biilla orrut, de vuhttogoahtá boađus, dadjá «Beintøft» prošeaktajođiheaddji Carl Fredrik Pedersen.
Beintøft.no siiddus sáhttá dađistaga oaidnit man guhkás oahppit leat vázzán, ja oaidnit sullii seston CO2 go ii vuoje biillain skuvlii.
Ollu vuoitit
Buot vuođđoskuvlaoahppit Norggas leat bovdejuvvon mielde «Beintøft» kampánjii.
Gilvu álggii čakčamánu 3. beaivvi ja bistá gitta 28. beaivái. Skuvlaluohkká sáhttá vuoitit 30 000 ruvnno.
– Buohkat geat servet leat vuoitit! Ollu čeahpes oahpaheaddjit deattuhit dan ohppiide, ja mii oaidnit ahte birasberoštupmi lassána gilvvus. Vaikko buohkat eai vuoitte váldovuoittu, de galget mánát dattetge leat duhtavaččat iežaset bargguin, lohká Rasmus Norsted.
Fáddávahkkut
Oasseváldit galget njeallje fáttá čađahit, nu go johtolatsihkarvuohta, ruskkat ja ribat skuvlaluoddagura, sihkkelastinillu ja dálkkádat.
