-Almmuhus-
-Almmuhus-
KULTUVRAVildaluodda gullogoahtá fargga 

Vildaluodda gullogoahtá fargga 

Journalista

-

-

Go Hildá Länsman ja Viivi Maria Saarenkylä gulaiga goabbatguoibmáska musihka vuosttaš geardde, de buollái ­jurdda seaguhit juoigama gesoniin.

Nu álggii sudno ovttasbargu ja dál ilbmadeaba iežaska vuosttaš ­skearru ovttas.

VILDÁ šattai ­joavkku namma.

 

Ovddideaba iežaska ruohttasiid

Soai fuomášeigga seaguhit luđiid gesona jienaiguin.

Čuojanas mii lea ollu geavahuvvon Suomas ja lea árbevirolaš čuojanas.

– Árktalaš báikkit, buolaš biekkat, stuora jávrrit ja suhkkes vuovddit. Dat lea munno ruoktu. Davvi. Dat báiki gos munno luondu riegádii, ja muittut ealáskedje. Báiki gos vižže inspirašuvnna, máidnasiid ja árbevieruid. Dat viiddis stoahkanšillju gos agálaš luottaid mielde oažžu mátkkoštit. Luondu lea earenoamáš meahcci. Dat lea báiki gos munno ruohttasat leat ja dovde iežadeame oadje­bassan, čilgeba VILDÁ joavkku juoigi Hildá ja čuojaheaddji Viivi.

Hildá juoigá, lávlu ja dearpá rumbbu.

Viivi fas čuojaha gesoniin ja lávlu veahkkin.

 

Ráhkadeabe luottaid ovttas

Sudno jietnaseaguhus lea imašlaš juoigan, jorggáhalli ritmmat ja improvisašuvdna earenoamáš vugiin, ja leaba viežžan ideaid Suoma álbmotmusihkas.

Go čuojaheaba, de doalvu sudno musihkka guldaleaddji davás, gos sámi luonddu biekkat bosodit, ­čilgejuvvo preassadieđáhusas.

– Go mearrideimme ovttas ­čavget vásáhusmátkái VILDÁ joavkun, de ean máhttán árvidit ge makkár gelddolaš mátkái ­vulggiime. Letne fuomášan, dovdan ja vásihan fárrolaga. Go váccašetne musihkkameahcis, de guđđe luottaid dego eará sivdnádusat máilmmis, ja báhcá dego mearkan meahccái, lea sudno ­čilgehus ovttasbarggus.

 

Čuojaheaba Anáris ja Heahtás 

Skearru lea báddejuvvon musihk­kastudios Helssegis 2018:s ja 2019:s, ja guosseartisttat leat Niillas Holmberg, Venta Ilona Blom, Mikko Heikinpoika Neuvonen, Stiliana Ravelska Tyrkkö, Christopher Rudolfo, Nathan Riki Thomson ja Mikko Renfors.

– Moai sávve beassat iežame musihkain čuojahit álbmotmusihkkadáhpáhusain, sihke olles Suomas ja viidáset máilmmis. Boahtte mánus čuojahetne Ruoŧas Show Case Nordic Folk Alliance konfereanssas, lohká Hildá Länsman.

Cuoŋománu 4. beaivvi almmuhuvvo skearru «Vildaluodda/­Wildprint», muhto ovdal almmu­heami, de čuojaheaba Anáris bearjadaga njukčamánu 22. ­beaivvi, ja beaivvi maŋŋel fas Heahtás Márjjabeivviin gos olbmot besset gullat sudno šuoŋaid.

– Munno plána lea johtit maiddái ámmátmusihkkadoaimmaid dáhpáhusain, vai gávdne oktavuođaid musihkkadáhpáhusaid lágideddjiide maid viidáset máilmmis, lohká Länsman.
-Almmuhus-