Viimmat lihkostuvai vuoitit

Johan Margidon Hætta lea vuodján biilacrossa gávcci jagi, ja ikte sotnabeaivvi gilvvohalai son Lofuohtas gos vuittii vuosttaš háve.

– Gal dat lei hui somá vuoitit. Mus leat vaikke man ollu nuppi ja goalmmát sajit, muhto in leat goassige ovdal vuoitán, nu ahte dál lei viimmat mu vuorru vuoitit, lohká son.

Vujii bures

Gilvvus, Evjenis Lofuohtas, ledje vihtta vuoru mas sáhtti kvalifiseret A-finálii. Hætta vuittiige njeallje dain ja oaččui dainna buoremus vuolggasaji A-finálas.

– Gilvvus galggai njeallje geardde vuodjit birra bána, ja buohkat galget okte vuodjit geainnu mii gohčoduvvo alternatiiva geaidnun, mii lea veaháš guhkit mohkki, muitala Hætta. Go Hætta beasai ovddemussii oalle álggus gilvvus, de doalahii son dan gitta mollii.

(Ášši joatká video vuolábealde)

Filbmen: Bodil Cecilie Hanssen

Buorre dovdu

Hætta muitala mannan vahkkoloahpa Álttás, su ruovttušiljus, ollii son maid vuosttažin mollii ja doaivvui ahte vuittii.

– Lágideaddjit čájehedje dalle munnje čáhppes leavgga, mii mearkkaša ahte sirde mu maŋemussii, danne go máhkaš ledjen sivalaš go beaškkehin oktii nuppiin biillain. Videos čájehuvvui ahte ii lean mu sivva. Danne leige dál hui buorre mávssahandovdu go vuiten, lohká Hætta.

(Ášši joatká gova vuolábealde)

Dábálaš biillat

Biilacrossa lea gilvu mas oasseváldit huksejit dábálaš biillaid ja gilvalit daiguin. Gilvvuid lágidit iešguđet mohtorsearvvit Davvi-Norggas, ja jagis leat badjelaš nuppelohkái gilvvu. Gáibádus leat mielde lea ahte ferte leahkit bensiidnabiila, mas ii galgga turbo dahje kompressor, iige oaččo geassit njeljiin juvllain.

Sáhttá massit biilla

Biilacrossas leat njuolggadusat nu ahte juohke gilvvuid maŋŋel sáhttet oasseváldit addit čuorvvasgávpefálaldaga juohke biilii mii lea mielde. Dat mearkkašage ahte buohkat sáhttet massit iežaset biilla, ja Hættai leage dat geavvan máŋgii.

– Biillat eai oaččo máksit badjel 9000 ruvnno, ja juohkehaš sáhttá vaikko galle čuorvvasgávpefálaldaga addit. Juohke fálaldat máksá 390 ruvnno, muhto lea nu ahte bidjet buot fálaldagaid ovtta skállui, ja de vuorbádit ovtta gii oažžu oastit biilla 9000 ruvdnui, muitala Hætta.

Goitge buorre ortnet

Vaikko Hætta mielas lea dat sáhttá hárbmadit massit biilla, de su mielas goitge lea buorre ortnet.

– Biilacrossa lea álbmotfalástallan, ja dat čuorvvasgávpefálaldatortnet dagaha ahte ii galgga gánnáhit hukset biilla mii ovdamearkka dihte máksá 200 000 ruvnno. Dat lea buorre, go nu šaddet gilvaleaddjit hui dássálaga, lohká son.

Lulás gilvalit

Hætta muitala son lea dál kvalifiserejuvvon riikaoassefinálii Elverumii loahpas dán mánu.

– Lea gelddolaš, muhto eai leat alla vuordámušat ovddemusaid searvái beassat. Dohko bohtet biillat mat mákset birrasii 50 000 ruvnno.