4-5 jahkái ii leat Ávviris leamaš fásta journalista Nuorta-Finnmárkkus, ja dál leat viimmat ožžon sámegielat journalista Girkonjárgii. Silje Malene Varsi lea gearggus čállit unnit ja stuorát áššiid Nuorta-Finnmárkku guovlluin.
Silje Malene álggii mannan vahkus bargui Ávvirii. Son lea ovdal bargan Ávviris, ja lei ge mielde álggaheami Ávvira 2008:s. 2010:s fárrii, ja lea dál fas máhccan ruovttoluotta ja bargagoahtán Ávviris.
– Mu kantuvra lea Girkonjárggas, ja sávan áinnas ahte olbmot cavgilit jus lea mihkke. Áinnas addit cavgilemiid earenoamáš dáhpáhusain dáin guovlluin, lohká Silje Malene.
Fásta journalista haga 4-5 jagi
– Mis ii leat leamašan báikkálaš kantuvra, iige fásta journalista Nuorta-Finnmárkkus 4-5 jahkái, ja leat hui ilus go dál leat ožžon sámegielat journalista dohko. Lea leamašan hui hástalus gávdnat sámegielat bargi dohko. Dat go mis ii leat leamašan journalista doppe lea dieđusge mielddisbuktán ahte eat leat nagodan čuovvut doppe sámi áššiid nu dárkilit go livččiimet áigon, mieđiha Ávvira váldodoaimmaheaddji, Kari Lisbeth Hermansen.
Boahtá mátkkoštit ránnjágielddain
Váldodoaimmaheaddji lea ge ilus go dál viimmat fas lea Ávviris fásta journalista barggus doppe:
– Silje Malenes lea kánturbáiki Girkonjárggas, muhto son boahtá maid olu mátkkoštit ránnjágielddain ja geahččalit leat sajis doppe gos leat dáhpáhusat ja áššit mat leat miellagiddevaččat min lohkkiide, lohká Hermansen.
Silje Malene Varsi lea vuos virgáduvvon sadjásašvirgái olggos borgemánu, muhto váldodoaimmaheaddji sávvá ahte aviissas lea vejolaš guhkidit bargošiehtadusa suinna ja oažžut Ávvirii fas bissovaš báikkálaš kantuvrra Nuorta-Finnmárkui.
– Cavgilehpet ja galledehpet!
– Mii leat ilus go dál leat fas ožžon su ruovttoluotta doaimmahussii. Mánnodaga fárrii Silje Malene dihtoriin ja govvenapparáhtain Mátta-Várjjat aviissa vistái Girkonjárggas, ja lea gearggus čállit unnit ja stuorát áššiid birra diein guovlluin. Mii sávvat nuorta-finnmárkulaččat leat áŋgirat cavgilit sutnje áššiid ja áinnas maid finadit su galledeame kantuvrras, lohká Kari Lisbeth Hermansen.
