-Almmuhus-
OĐĐASAT– Viimmat čielga fáktavuođđu ruvkedoaimma ektui

– Viimmat čielga fáktavuođđu ruvkedoaimma ektui

-

-

Vista Analyse lea fuobmán máŋga stuorra negatiiva biras- ja servodatekonomalaš váikkuhusaid ruvkeplánain.

Dál biddjojuvvui guorahallanfitnodaga Vista Analyse raporta ovdan, mii lea ráhkaduvvon Sámedikki ovddas. Raporta čujuha dakkár stuorra negatiiva servodatekonomalaš váikkuhusaid, mat eai leat ovdal árvvoštallojuvvon Fálesnuori ruvkeplánaid oktavuođas ja luoitimiid oktavuođas Riehppovutnii.

Servodatekonomalaš váikkuhusat ruvkedoaimmain Riehppovuonas Fálesnuoris leat nu eahpesihkkarat, ahte berre čuovvut dan prinsihpa ahte lea buoret láhttet várrugasat ja bissehit plánaid, dieđiha Sámediggi preassadieđáhusas.

 

– Viimmat fáktavuođđu

– Dál mis lea viimmat fáktavuođđu mii čielgasit čájeha ahte Riehppovuona ruvkedoaimmat máŋgga láhkai leat vahágin lundui ja daid olbmuide geat doppe ásset. Ii leat vuođđu direktoráhta dahje ráđđehusa čuoččuhusaide ahte prošeavttas leat positiiva servodatekonomalaš váikkuhusat, dadjá Silje Karine Muotka, Sámediggeráđi lahttu.

 

Stuora eahpesihkarvuohta

Birasdirektoráhta attii juovlamánus mannan jagi ruvkefitnodahkii Nussir ASA ruvkedoaibmanlobi Nussir ja Gumppenjuni váriin, ja lobi vurket bázahasávdnasiid mearravuorkái Riehppovuonas. Birasdirektoráhta mearrádus dahkkojuvvui dievasmeahttun analysaid vuođul. Direktoráhta mearrádus ii váldde doarvái bures vuhtii ii birrasa, álbmotrievtti ii ge dan stuorra eahpesihkarvuođa mii lea čadnon prošeavtta servodatekonomalaš beliide, dieđiha Sámediggi preassadieđáhusas.

 

Álttá ášši rájes stuorámus sisabahkken

– Ruvkevuorká Riehppovuonas lea stuorámus sisabahkken sámi guovlluide Álttá ášši rájes. Mii vuordit ahte Birasdirektoráhta nuppástuhttá dan ruvkelobi mii addojuvvui Nussir ASAii mannan jagi, dadjá Muotka.

 

Ruvkedoaibma guovllus vahágahttá sámi kultuvrra ja servodaga nuoskkideami geažil, daddjojuvvo raporttas. Álbmotrievtti vuođul galget eiseválddit garvit dakkár sisabahkkema mii garrasit áitá dahje bilida guovllu sámi kultuvrra luondduvuđđosa, čuožžu preassadieđáhusas maid Sámediggi lea sádden.

-Almmuhus-