Duodjebájit leat nu bivnnuhat ahte dievihit moatti diimmus. Kaisa Mariell illuda go beassá oasálastit guovtti duodjekurssas beassášvahkkus. Diibmá oainnat ii lean sadji sutnje.
Duodjebájit leat nu bivnnuhat ahte dievihit moatti diimmus. Kaisa Mariell illuda go beassá oasálastit guovtti duodjekurssas beassášvahkkus. Diibmá oainnat ii lean sadji sutnje.
Duodjeinstituhtas, Kárášjogas lágiduvvojit duodjebájit beassášvahkkus.
Kurssat leat geasuheaddji ja dievihit moatti diimmus maŋŋel go almmuhuvvojit.
Kaisa Mariell Kaaby Balto (9) lea vuosttaš geardde duodjebájis.
Son ja vihtta eará nieiddaža bárgidit giehtabáttiid maid hervejit silba lávggastagaiguin.
– Mun liikon ieš ráhkadit čiŋaid ja dávviriid. Mu mielas lea álki ráhkadit dán giehtačiŋa go láven veahá bárgidit ruovttus. Ihttin ges áiggun duddjot boahkána. Mu mielas lea hui somá duodjebájiin, muitala son.
Viimmat
9-jahkásaččas lea eadni Karina Kåven Kaaby mielde.
Son rámida duodjebájiid mat lágiduvvojit mánáid várás.
– Mu mielas lea máilmmi buorre go lágidit duodjebájiid mánáid várás. Kaisa liiko giehtabargguide ja dalle lea sutnje somá oasálastit kurssain, muitala Karina.
Son muitala ahte lei áigon dieđihit Kaisa kursii jo diibmá.
– Geahččalin diibmá dieđihit nieiddaža duodjebádjái, muhto sajit ledje áigá dievihan. Nu ahte go dán jagi almmuhedje duodjebájiid, de gal dieđihin Kaisa dakkaviđe guovtti kursii. In háhppehan sus oba jearrat searvvašii go, muhto dieđán ahte sus lei hui miella, mojohallá Karina.
Dievihit moatti diimmus
Duodjeinstituhta duodje- ja designbagadalli Heidi Gaup muitala ahte sihke giehtabádde- ja boagánkursa mat lágiduvvojit beassášvahkkus dievihedje jođánit.
– Mánáid duodjebájit dievihedje beaivvis justa dego diibmá, goappašat kurssat dievihedje moatti diimmus. Lea hui somá oaidnit ahte mánát beroštit duojis ja sii dáidet min geavaheaddjin boahtte áiggis, lohká son ja muitala ahte fállagohtet vel eanet doaimmaid nuoramusaide maŋŋil basiid.
– Mis leamaš duodjeeahkedat mánáid várás, muhto gaskkalduvaimet go dáppe lágiduvvojedje nu olu eará kurssat. Jurdda lea fas álggahit duodjeeahkediid mánáide ja nuoraide maŋŋil basiid.
Luopmu ja duodji
Buot giehtačikŋakurssa oasseváldiin lea gullevašvuohta Kárášjohkii, muhto eatnašat orrot eará guovlluin.
8-jahkásaš Johanne Anti Billington lea boahtán Lommedalenis.
– Mii leat beassášluomus Kárášjogas ja lean ovdal maid oasálastán dáid duodjebájiin. Mu mielas lea somá go dalle beasan ieš ráhkadit čiŋaid ja dávviriid. Diibmá ráhkadin sihke boahkána, giehtabátti ja čeabetčiŋa, muitala son.
Ovttastallet
Ida Marie Andersen Anti (7) gal orru Kárášjogas, ja muitala ahte searvá duodjebádjái ovttas iežas oarpmeliiguin Johannin ja Era Isabelain.
– Soai eaba oro dáppe muđui, ja lea hui somá go beassat ovttas vuolgit duodjekursii, dadjá Ida Marie ja joatká muitaleames manin son háliidii vuolgit duodjebádjái.
– Mu mielas lea somá duddjot giehtabátti ja in ge leat ovdal leamaš mielde dákkár kurssas, danin háliidin mielde, lohká son.
Miellagiddevaš
Lill-Eli Jørgensen-Dahl gii ráhkada LilleLi mearkasaš čiŋaid lea mánáid bagadalli.
Su mielas lea somá máhccat ruovttubáikái oahpahandihte nuoramusaid.
– Mu mielas lea hui miellagiddevaš ja hui hearvái go mánát čájehit beroštumi dása. Odne lean oahpahan mánáide makrame bárggáldaga ja dat lea hui bivnnut justa dál. Dán bárggáldagas sáhttá ráhkadit sihke giehta- ja čeabetčiŋaid, muhto maiddái eará dávviriid dego seaidnečiŋaid, loahpaha Lill-Eli Jørgensen-Dahl.
