Odne leat eambbosat ohcamin albmá guhte lea Deanus láhppon ja politiija bijusjođiheaddji doaivu oažžut odne maid veahki helikopteriin.
Finnmárkku politiija bijusjođiheaddji Tommy Michaelsen, gii lea jođiheamen ohcamiid Sieiddás Deanus, lohká sii leat ain olles veagain ohcamin Odd Henry Lahm.
– Mis leat odne ollu eambbosat ohcamin albmá go ikte, sihke Siviilasuodjalusas ja Ruovttosuodjalusas, sii leat dál dárkileabbo ohcamin lagaš guovlluin, dadjá Michaelsen.
(Ášši joatká gova vuolde)
Eaktodáhtolaččat, Ruovttusuodjalus, Siviilasuodjalus, Norgga gádjunbeatnagat, politiijat, buollinčáskadeaddjit ja Rukses Ruossa leat ohcamin dál 80-jahkásaš Odd Henry. Dál leat birrasii 200:s mielde ohcamin Odd Henry Lahm gii ii leat dihtton lávvardat rájes. Sotnabeaivve dieđihedje ruovttubuohccidivššárbálvalusas ahte son ii lean ruovttus Sieiddás. Sotnabeaivve eahkeda ja ija mielde ohcagohte ge veahkkebálvalusat albmá.
Doaivva oažžut veahki
Politiija bijusjođiheaddji lohká sii dađibahábut eai leat odne ožžon veahki Suodjalusa helikopteris.
(Ášši joatká gova vuolde)
– Mis lea doaivva oažžut veahki Sea King helikopteris, muhto dalle fertet gávdnat sajiid gos eai leat vel ovdal leamašan ohcamin ja fertejit sajit gos mii oaivvildit leat dehálaš ohcat, lohká son.
Viiddidan ohcama
– Mii leat ohcan ođđasit daid seamma sajiin gos ikte leat ohcan, muhto odne leat ohcamin dárkileabbo. Leat maiddái viiddidan ohcama, gos mii leat ožžon dieđuid ahte son lea vánddardan ovdal, muhto mis eai leat dieđut ahte son lea leamašan dáid sajiin dál, dadjá son.
