Leat go ožžon geassebarggu? Dáid diŋggaid berret muitit.
Máŋgasii lea dál vuosttaš deaivvadeapmi njuolggadusaiguin maid ovdalaččas eai dovdda. Olmmoš sáhttá bargat boastut, ja muhtumat soitet ballat jearramis veahki dahje muitalit jus juoga lea nu go ii galgga.
– Danne lea dehálaš ahte nuorat oahpásnuvvet njuolggadusaiguin sihke bargoeallimis obbalaččat ja maid bargosaji njuolggadusaiguin, dadjá Bargobearráigeahču direktevra Trude Vollheim preassadieđáhusas.
Vihtta rávvaga ođđa bargiide
Bargobearráigeahču direktevra čoahkkáigeassá viđa rávvagis daid deháleamos diŋggaid maid ođđa bargi berre diehtit ja dahkat:
Vihtta rávvaga ođđa bargiide
1. Buohkain galgá bargošiehtadus
2. Buohkat galget diehtit goas ja man guhká galget bargat
3. Buohkaide galgá oahpahallanáigi dan barggus maid galget bargat
4. Buohkat galget diehtit gii lea suodjalusáittardeaddji bargosajis
5. Buohkain galgá unnimusat okta boddu jus bargoáigi lea eambbo go 5,5 diimmu
Mii bargošiehtadusas galgá čuožžut?
Bargošiehtadus lea dokumeanta du barggu birra. Ovtta iskkadeamis 2021:s vástidedje ovccis logi nuoras ahte sii dihtet ahte sis galgá čálalaš bargošiehtadus. Muhtumin oaidnit dađi bahábut ahte šiehtadusain leat váilevašvuođat.
– Bargošiehtadusas galgá earret eará čuožžut bargoáiggi birra, bálká, badjeláiggelasáhusa sturrodat, eretcealkináigi ja galle bottu dus galget, muitala Vollheim.
Bargobearráigeahču neahttasiiddus sáhttá lohkat eambbo mii bargošiehtadusas galgá čuožžut.
Oahpásnuva iežat rivttiide, ja muital jus juoga ii leat dohkálaš
Máŋggas galget bargoeallimii vuosttaš geardde, ja dasa lassin go fertejit dovdat iežaset rivttiid, muittuha Vollheim ahte sii fertejit ieža váldit ovddasvástádusa ja muitalit hovdii jus juoga lea boastut.
– Jus leat eahpesihkar iežat rivttiide, dahje dovddat ahte juoga ii leat dohkálaš du bargosajis, de sáhtát váldit oktavuođa luohttámušolbmuin dahje suodjalusáittardeddjiin, dadjá Vollheim.
