Guokte veagalváldinášši ja guokte loavkidanášši leat váidojuvvon politiijaide maŋŋel mannan vahkkoloahpa festivála Leavnnjas.
Vaikko moadde ášši leatge váidojuvvon politiijaide maŋŋel mannan vahkkoloahpa suohtastallamiid Midnattsrocken festiválas Leavnnjas, de lea politiijaid mielas festivála mannan bures.
Oktiibuot leat vihtta mannan vahkkoloahpa dáhpáhusain váidojuvvon politiijaide.
– Mii leat ožžon moadde váidaga, muhto eat nu beare olu go jurddaša man olu olbmot dat leat leamaš festiválas. Olbmot leat ollislaččat láhtten bures, ja leat ceggejuvvon unnán rihkusášši Midnattsrockena oktavuođas, čállá doaibmi leansmánni Siri Ulverud preassadieđáhusas, gii rámida olbmuid buori festiválaláhttema ovddas.
Narkotihkkabeana ii gávdnan maide
Politiijat leat ovddit jagiid váldán narkotihkkabeatnagiid Midnattsrockenii, dárkkistan dihte lea go festiválaoasseváldiin narkotihkka mielde festiválas.
Earrun ovddit jagiide, de eai gávdnan beatnagat maide dán jagi.
– Ovddit jagiid mii leat váldán oallugiid das go sis lea leamaš narkotihkka mielde festiválas, muhto eat dán jagi. Dáinna mii leat hui duđavaččat, go dat mearkkaša ahte mii leat bargan buori eastadanbarggu, dadjá Ulverud preassadieđáhusas.
Guokte veagalváldinášši
Guokte dáin áššiin leat veagalváldinášši, main goappašagain lea okta váldojuvvon gitta go várohuvvo leat bargan vearredagu.
– Goappaš áššiin válduiga áššáiduhtton olbmot gitta, ja luituiga fas luovos go leigga gažaduvvon. Maiddái gillájeaddjit leaba gažaduvvon goappaš áššiin. Dál váilot vel vihtangažadeamit, muitala Ulverud.
Politiiját eai áiggo cealkit eambbo áššis, go leat ain dutkame ášši.
Časkii festiválavávtta
Maiddái leat ceggejuvvon guokte rumašloavkidanášši.
Nuppi áššis lea sáhka ahte muhtin festiválaoasseváldi časkkii nuppi festiválaoasseváldi.
Nuppi áššis fas lea sáhka ahte muhtin festiválaoasseváldi časkkii Midnattsrockena vávtta.
Politiijat leat dutkame áššiid, ja ain váilot muhttin gažadeamit áššis.
Seksuálalaš loavkidahttin
Dasa lassin lea ceggejuvvon okta seksuálalaš loavkidanášši, muhto lea ain árrat ja politiijat eai sáhte vel dadjat olus áššis.
Politiijat leat dál bargame gávnnahit mii geavai ášši oktavuođas, ja leat dál bargame gažademiiguin.
Guđas masse vuodjinlobi
Maiddái johtolagas rihkko muhtimat lága.
Oktiibuot dárkkistuvvojedje guhttačuođi vuoddji Leavnnjas ja Leavnnja lagasguovlluin vahkkoloahpas, ja muhtimat sáhkkohalle.
Golmmas masse vuodjinlobi alla leavttu geažil, ja golmmas masse vuodjinlobi promillavuodjima dihte.
Guovttis sáhkkohalaiga go vujiiga vuollegis promillain – promilla gaskkal 0,2 ja 0,5.
Ollislaččat duđavaččat
Politiijat dieđihit ahte lea leamaš veahá rigearra vahkkoloahpas, muhto ii eambbo go dábálaččat festiválaid oktavuođas.
Oktiibuot bálkestuvve 4-5 olbmo festiválabáikkis eahpedohkálaš láhttema dihte.
