-Almmuhus-
-Almmuhus-
OĐĐASAT Viessu bulii gutnan – eai dieđe vel buollin­siva

Viessu bulii gutnan – eai dieđe vel buollin­siva

-

-

 Ii oktage lean láigoásodagain go viessu buollái.  Politiijat leat juo dutkagoahtán mii álggahii buollima.

Operašuvdnajođiheaddji Leo Johansen muitala ahte sii ožžo dieđu buollima birra tiibmu 09.30 odne, bearjadaga 19. beaivvi. Son muitala ahte buollinčáskadeaddjit ledje báikkis tiibmu 09.30.

– Oidno ain veaháš buollimin. Muhto ásodagaid gal sáhttá lohkat ahte leat ollásit billašuvvan. Dál, go njuovččadola lea čáskadan, de lea velá báhcán jáddadit gos ain oidno dolla dahje suovva. Suovvabuokčit geahččaledje beassat nuppi ásodahkii, muhto fertejedje jorgalit go eai oaidnán čađa máskka go máska bulžui. Suovvabuokčit fertejedje jorgalit. Eai galgga leamaš olbmot viesus, čilge operašuvdnajođiheaddji Leo Johansen.

Eai dieđe buollinsiva

Son ii loga diehtit manin viessu lea buollán. Politiijat lea juo sajis ja leat dutkagoahtán, muhto eai sáhte vuos dutkagoahtit buollán viesu ovdal go lea čoskon. Dálus eai lean olbmot.

– Nu jođánit go čoasku, de iskagoahtit mii álggahii buollima, joatká Johansen.

Lohká su dieđu mielde eai leamaš erenoamáš hástalusat buollinčáskadeamis vaikko lea buolaš, eai ge su dieđu mielde leat eará gielddaid buollinčáskadeaddjit  boahtán veahkkin. 

GUDNAN BUOLLÁN. Kárášjoga gieldda 2-ásodaga viessu Juhána Rašttoš geainnus bulii gutnan 19.02.2021. Govva: Astrid Helander
GUDNAN BUOLLÁN. Kárášjoga gieldda 2-ásodaga viessu Juhána Rašttoš geainnus bulii gutnan 19.02.2021. Govva: Astrid Helander

DRÁMA KRÁNNJÁDÁLUS. Studeanttaguovttos Zian ja Anders leaba dál oahpahallit SÁNAG:s ja buollinčáskadeaddjit bokte sin go bohte. Kárášjoga gielddas ledje 27 gráda buolaš ja beaivvádat: Muitaleaba soai leaba eret Oslos. Govva: Astrid Helander
DRÁMA KRÁNNJÁDÁLUS. Studeanttaguovttos Zian ja Anders leaba dál oahpahallit SÁNAG:s ja buollinčáskadeaddjit bokte sin go bohte. Kárášjoga gielddas ledje 27 gráda buolaš ja beaivvádat: Muitaleaba soai leaba eret Oslos. Govva: Astrid Helander

Suorganan kránnját

Kránnjádálus logi mehtera buolli dálus, ássaba Anders ja Zian, ja soai muitaleaba sii leat golmmas geat ásset das. Sii leat Kárášjogas oahpahallanbarggus SÁNAG:s go sii lohket sosiálafága nuppi jagi Álttás, UiT universitehtas.

– Mii moriheimmet ja suorganeimmet go gulaimet ahte buollinčáskadeaddjit bohte min boktit, birrasii beallogis. buollinčáskadeaddjit čoalkkuhedje uksii ja mii viehkaleimmet njuolga olggos. Easkka dalle fuomášeimmet ahte veaháš suovva suovastii kránnjádálus. Dađistaga suovastii eanet ja eanet ja šloavggehii, muitala Anders.

– Ii lean nu olu dolla vuos, lei dat oassi mii lea geaidnoearu lahka. Ean leat goassege vásihan ahte ná lahka buollá dállu gos ieža ássat. Lea ilgat. Politiija finai mis jearran mo lei dáppe álggos go buolligođii, lohká Zian. 

Anders guovttos Zianiin muitaleaba ahte ii oktage ássan kránnjádálus, lei guoros viessu. 

Nuorra albmát leaba iđitbotta čužžon olgun ja čuvvon mielde mo čáskadit viessobuollima Kárášjogas.

-Almmuhus-