– Lea ipmirmeahttun láhtten Norgga Politiijas ja ášši lea heahpadin Norgga stáhtii, dadjá Greta Thunberg.
Beakkán birasaktivista Greta Thunberg lei maid departemeantta luhtte ihkku go politiijat gudde aktivisttaid olggos. Son lei hirpmahuvvan.
– Lea ipmirmeahttun láhtten Norgga Politiijas, muhto dat lea maid hui govvideaddji. Jurddaš, ihkku čađahit dákkár akšuvnna ja bággejit 15 minuhtas leat gearggusin guođđit visot, lohká Thunberg.
Son lea maid hirpmahuvvan Norgga stáhtain.
– Norggas lea stuora ovddasvástádus olmmošvuoigatvuođaid ektui, muhto ii dušše dan ektui, muhto maiddái eamiálbmotvuoigatvuođaid, dálkkádatroasu, birasroasu ektuige. Norggas lea historjjálaš sivva dasa mii dáhpáhuvvá, cealká Thunberg.
– Heahpadin Norgii
Thunberg lohká dán ášši heahpadin Norgii:
– Norgga stáhta ii sáhte šat giddet čalmmiid iige oaidnit olmmošvuoigatvuođarihkkumiid mat dáhpáhuvvet. Dása ferte loahppačoavddus boahtit, dajai Thunberg apeallas maid doalai departemeantta olggobealde mánnodatiđida.
