2-jahkásaš Mika Lionel lea Álttás eret, ja lei Gávvuonas oaggume go vuoitoguoli gottii. Dat lei dápmotveajehaš mii dohppii ja buvttii Mika Lionelai vuoitolihku.
Ávvir lágida mánáide «Guollelihkku» nammasaš oaggungilvvu olles geasi gitta borgemánu 15. beaivái. Dan oktavuođas vuorbádit ođđa oaggunstávrrá vuoiti juohke vahku. Mika Lionel vuittii mannan vahku stávrrá.
Mika Lionela eadni, Maret Elle Eira, muitala Mika Lionela ovddas dáhpáhusa birra:
– Bisáneimme somás dihte Mika Lionela edno luhtte oaggume go leimme vuojašeame. Son áiggui dušše geahččalit stávrrá, oaidnit mot dainna lea oaggut. Dápmot dohppii vuggii ja de beasai dan geassit gáddái. Oba somá vuoitit stávrrá dainna guliin!
Šaddan guolleáŋgirin
Mika Lionel lei vuosttaš háve geahččaleame stávrráin bivdit.
– Lihkus lei ednos liigestávrá mielde Mika Lionelai go bisáneimme. Vaikko lei veaháš issoras geassit guoli gáddái, de duosttai ieš geassit. Dápmoha man gottii válddiime ruoktot čájehan dihte áhččái, villjii ja oabbái. Dan rájes lea hui guolleáŋgirin šaddan ja dál beassá ge iežas stávrráin bivdit!
Mika Lionel lea dan rájes go gottii guoli leamaš akvariijas. Doppe lea oaidnán iešguđetlágan guliid.
– Mika Lionel geahččalii akvariija guliid maid bivdit. «Guoli bivdit», logai ieš ja mahkáš oaggu.
