Viđas heavvanedje mannan mánu 

Buot 12 olbmo, geat dássážii dán jagi leat duššan, ledje dievddut. Guovttis heavvaneigga Nidjohkii Troandimis.

Dat dagaha ahte Trøndelágas leat eanemus heavvaneamit dán jagi, golbma. Hordalánddas ja Nordlánddas leat guokte goappá ge fylkkas. 

Sihkarvuohta jieŋa alde

Giđđa ii leat vel lahka ge, ja buollašat ain bistet. Dat dagaha ahte olusat ain finadit jieŋa alde, oaggume ja njulgejit jávrri rastá jus leat manname gosa ge. 

Redningsselskapet gádjunorganisašuvdna ávžžuha buohkaid várrogasat vánddardit jieŋa alde. Diibmá dušše golmmas go doddjojedje jieŋa čađa. 

– Lea hui dehálaš mánáiguin hupmat sihkarvuođa birra. Govddodanveasta ja liegga biktasat leat ávkin, muhto mánát eai galgga čáhcegáttis ieža stoahkat, lohká Redningsselskapet gulahallanhoavda Frode Pedersen.

Rávvagat

• Eai ávžžut mannát jieŋa ala mii ii leat aseheabbo go 10 centimehtera. Mearrajiekŋa ii leat liikká guoddil go sáivačáhcejiekŋa.
• Várut dakko gokko dábálaččat čáhci lihkada. Dákko sáhttá assodat rievdat mehteriin. 
• Iskka temperatuvrra ja gárvot bivvanládje. Váldde molssabiktasiid mielde.
• Jieŋa alde sáhtát gádjunveastta atnit. Jiekŋasákkiid maid sáhtát atnit mielde. 
• Ane telefovnna čáhcejeahkki seahkas. 
• Čana bátti iežat birra vai earát sáhttet veahkkin jus doddjot. 
• Jus lehpet máŋggas jieŋa alde, de berre buorre gaska.
• Gáddeguoras, oivožis ja joganjálmmis berre váruhit.
• Jus doddjot, de berret geahččalit beassat bajás seamma geainnu gokko bohtet. Jus eai leat jiekŋasákkit mielde, de fertet geahččalit doalahit rupmaša ja julggiid nu badjin go sáhtát, ja geahččalit vuodjat gáddái.