Feastariedja, doarrun ja muhtin lei beare gárremin ieš dádjadit ruoktot. Dás logat oasi Finnmárkku politiijaid barggus mannan ija.
Feastariedja, doarrun ja muhtin lei beare gárremin ieš dádjadit ruoktot. Dás logat oasi Finnmárkku politiijaid barggus mannan ija.
Girkonjárgga politiijat šadde mannan ija mannat kebabvuovdi jorri lusa Girkonjárggas, go vihtta olbmo ledje seahkánan doarrumii.
– Mii leat álggahan ášši ovtta olbmo vuostá, ráŋggáštuslága 350§ mielde. Son lea álgo 20-jagiin. Ii leat gal váldon gitta, muhto mii leat dutkame ášši dál. Dát dáhpáhuvai Kebab-jorri olggobealde Girkonjárggas, ja ledje oktiibuot vihtta olbmot doarrumis. Dáid doarrumiid oktavuođas leat ovddiduvvon rasisttalaš cealkámušat, muitala Nuorta-Finnmárkku politiijaid operašunjođiheaddji Stein Erik Jakobsen Ávvirii.
Doarrái politiijaiguin
Girkonjárggas lea maid nissonolmmoš (21) váldon gitta go doarrái politiijaiguin Rallaren olggobáikki olggobealde maŋŋelaš diibmu guovtti.
– Go politiijat bohte vuoji, de álggii unohasat láhttet ja čiekčat politiijaid. Politiijat eai oaidnán eará čovdosa go váldit su fárrui, go ii lean ávki hupmat ja son lei hui aggressiiva. Politiijat fertejedje su doallat vuollin go rohkkáhii politiijabálvváid. Beaivvi mielde luoitit su fas mannat go lea čielgan, ja son váido dán áššis, muitala operašunjođiheaddji Jakobsen.
Golmmas dorron
– Girkonjárggas leat muđui vel eanet doarrumat. Guokte dievddu ja okta nissonolmmoš, geat leat gaskal 20 ja 25 jagi, ledje doarrán. Diibmu 06.46 bođii diehtu politiijaide dán ášši birra. Dás lea sáhka ollu alkoholas ja maid nihttimis. Leat čorbman ja muhtin lea deaivvahallan čorpmaide, muitala operašunjođiheaddji Jakobsen.
Priváhta feasttat
Girkonjárggas ledje Nuorta-Finnmárkku politiijat maid golmma iešguđet priváhta čujuhusas feastarieja dihte:
-Diibmu 03.48 manne vissui gos lei alladit musihkka ja garra riedja. Dan feastta heaittihedje politiijat.
-Diibmu 03.47 ledje viesus Hessengas ges Girkonjárggas, gos ledje ollu olbmot, ollu alkohola ja hui riedja. Ránnát eai lean bállen oađđit go sis ledje rabas láset. Politiija heaittihedje feastta.
-Hessengas ledje juo diibmu 03.01 leamaš muhtin eará viesus gos čuojahedje beare garrasit musihka. Doppe fertejedje vuolidit musihka.
Viimmáskan
Čáhcesullos leat politiijat maid heaittihan feasttaid go leat rigeren bearehaga.
Diibmu 01.50 ledje politiijat muhtin priváhta viesus go čuojahedje beare alladit musihka. Ledje guokte olbmo dán feasttas, ja lei uksa rabas. Feastaolbmot eai lean aggressiiva, muhto viimmáskan, muitala operašujođiheaddji
Maiddái Oarje-Finnmárkkus leat olbmot juhkan ja moiven manna ija, čállet politiijat Twitteris.
Hámmárfeasttas fertejedje politiijat veahkehit nissonolbmo gii čohkkái luoddaguoras ja lei hui gárremin.
Álttás fertejedje gohččut guoktása eret Álttá guovddážis riedjama geažil, ja Álttá politiijat leat maid šaddan unnidit feastarieja ássanguovlluin.
