-Almmuhus-
VALÁŠTALLANViđain beatnagiin jođus mollii

Viđain beatnagiin jođus mollii

-

-

Kárášjohkalaččat eaba leat vuodján hástalusaid haga. Nubbi gal lea ain mátkkis.

Kárášjohkalaš Silje Máret Somby  (24) lei okta dan 70 beanavuoddjis geat FL 500-gilvvus vuoddjájedje Álttás mannan vahkkoloahpa. Son lea dál nuppes dáin gilvvuin. Diibmá searvvai vuohččan, ja bođii gávccádin FL500 -gilvvus.

Son lea ain mielde gilvvus, vaikko leat leamaš olu hástalusat.

 

Golbma beatnaga guođđán

Dan rájes Somby vulggii Álttás, lea son beassan veahá bártidit. Sus lea reahka billahuvvan, maid šattai lonuhit, reahkačuovga billahuvvan ja golbma beatnaga šaddan guođđit. 

Dál go lea Kárášjogas Joatkkai jođus, eai leat sus fárus šat go vihtta beatnaga. Buot dát viđas fertejit leat fárus go joavdá mollii, lea njuolggadus. 

 

Vuollánii

FL 500-gilvvus lea maid nubbi kárášjohkalaš, Børge Johansen, gii lea nuppi beanavuoddji, Biret Astrid Utsi, ovttasássi. Son lea viđa háve searvan ja ollen mollii guktii. Ovdal gilvvu logai buori jáhku lihkostuvvat, vaikko ii leat nu olu šaddan hárjehallat. Nu ii šaddan.

Ollii Váljohkii 33. beanavuoddjin guđain beatnagiin. Vuoiŋŋastii doppe diimmu ovdal go dollii fas. Das ii mannan guhká ovdal vuollánii ja bisánii.

-Almmuhus-