Finnmárkku politiijat dieđihit ahte Suoma eiseválddit suvvet muhtin mátkkošteddjiid vuodjit Suoma čađa dan botta go Nuovasmuotki lea gitta ja áidna luodda Finnmárkkus Romsii lea Suoma čađa.
Nuppes oanehis áiggis lea davimus oassi Norggas isolerejuvvon go luodda Nuovasmuotkki badjel lea fas gitta. Stáhta geaidnodoaimmahat dieđihii lávvordaga ahte Nuovasmuotki lea gitta go lea uđasvárra báikkis, sotnabeaivvi diibmu logis árvvoštallet fas ođđasit lea ge vejolaš rahpat geainnu.
Suoma čađa
Dan botta go áidna geaidnu Finnmárkkus Romsii lea gitta, de leat Suoma eiseválddit dieđihan ahte lea vejolaš vuodjit Geađgeluobbala bokte Gilbbesjávrái ja das viidásit fas Romsii. Muhto buohkat eai beasa Suoma čađa.
– Suoma eiseválddit suvvet vuodjit Suoma čađa njukčamánu 8. beaivvi diibmu 00.00 rádjái. Dat váldonjuolggadus guoská vuosttažettiin bargomátkkošteddjiide ja Suoma rájavárdit árvvoštallet sisabeassaneavttuid ovttaskas áššiin, čállet Finnmárkku politiijat Twitteris.
Politiijat dieđihit viidásit ahte olbmot geat šaddet vuodjit Suoma čađa eai dárbbat erremii go bohtet fas Norgii, jus fal vudjet njuolga Suoma čađa.
