-Almmuhus-
-Almmuhus-
-Almmuhus-
VALÁŠTALLANVejolaš šaddat sprintagonagassan ja dronnegin

Vejolaš šaddat sprintagonagassan ja dronnegin

-

-

Bingesgilvvuin lea dán jagi sprinta oassin váldogilvvus, ja dat buktá vejolašvuođaid trim-luohká oasseváldiide časkit gilvoluohká oasseváldiid.

Dán jagáš Binges-gilvvuin leat lágideaddjit bidjan guokte dihto gaska mii lea sprinta, dahje oanehisgilvu.

 

Gizzut ja čierastit

Vuosttaš sprinta oassi lea njeallje kilomehtera ja galgá goargŋut Biggeluoppal duottarstobus gitta Mázejoga duohkái. Nubbi ges lea vulos miehteluohkáid ovdalaš Máze, ja lea guokte čuokkis golbma kilomehtera guhku.

Gilvvuid jođiheaddji Marit Helene Eira lohká sii leat váldán dan mielde go dat orro hui somás vuohki ja heive sin gilvvuide.

– Vuoitit dan vuosttaš sprinttain šaddet gizzungonagassan- ja dronnegin, ja nuppis fas čierastangonagas- ja dronnet, lohká Eira.

 

Vejolaš časkit «proffaid»

Lágideaddjit leat árvvoštallan ahte gizzunsprinta ádjána gávcci minuhta ja čierastansprinta ges golbma minuhta.

– Das lea vejolašvuohta sidjiide geat sihkkelastet trim-luohká časkit sin geat sihkkelastet gilvoluohká. Trim-luohká oasseváldit han sáhttet bisánit ja vuoiŋŋastit ovdal sprintabáikki, ja de duolmmastit nu ollu go nagodit dan sprinta. Mun gal jáhkán dat lea vejolaš, lohká Eira.

 

Telefuvnnain registrerejit

Leahkit mielde sprinttas ferte registreret «strava» nammasaš applikašuvnna iežas telefovdnii, ja nu registrerejuvvo sprintii mielde. Lágideaddjit dáhttot oasseváldiid dan dahkat ovdagihtii, dan sivas go ii leat nu buorre telefovdnasignála Mieronis.

– Sprintabáikkit leat maid merkejuvvon hui dárkilit máđijas, ja oaidná maid appas gos dat leat, lohká Eira.

Son muitala maid ahte sii leat oaidnán ahte leat ollu ođđa oasseváldit geat leat dieđihuvvon Binges-gilvvuide. Muđui leat oasseváldiidlohku sullii seamma go diibmá, birrasiid 150 olbmo.

 

 

 

 

 

.

-Almmuhus-