Vejolaš gullat myhtalaš sámi joavkku

AKKIL artista lea anonyma, muhto oallugat leat várra gullan lávlagiid “Duoddara giron”, “Davás” ja “Mii livčče” interneahtas.
Dál lea olbmuin vejolašvuohta gullat su. Lea várra vuosttas ja maŋimuš geardde, dieđiha Márkomeannu preassadieđáhusas. 

– Mun in čuoččo lávddis 

Sii sáhttet maid muitalit ahte lea leamaš váttis oažžut oktavuođa artisttain, ja lei velá váddáset oažžut su lávdde ala vuolgit. 

AKKIL:a vástádus lei «Mun in čuoččo lávddis» go oaččui jearaldaga Márkomennui searvat.
Dál lea Márkomeannu nagodan oažžut AKKIL:a boahtit, ja lea áidna festivála lágideaddji gii lea lihkostuvvan dainna. AKKIL:a guosseartisttat háliidit maid leat anonymat. 

Heive bures festiválii

Festiválajođiheaddji Anne Henriette Reinås Nilut dadjá ahte AKKIL heive bures dán jagáš festiválii. 

– Go festiválaguossit bohtet festiválabáikái de sii besset čuovvot min 100 jagi ovddosguvlui Gállogieddái 2118:ii, mii dalle lea áidna sámi friddjabáiki. Mii galgat ealáskahttit sámi sáŋgára Anders Larsen, Elsa Laula  Renberg ja Jaako Sverloff eallima, ja mis lea AKKIL anonyma artistan, čilge festiválajođiheaddji Anne Henriette Reinås Nilut. 

Vuosttaš ja maŋimus gearddi? 

Artista háliida fállat erenoamáš vásáhusa. Lágideaddji lea danin láigohan stuora šearpma gos su visuálalaš ja digitálalaš govat vuosehuvvojit. Festiválajođiheaddji muitala sis lea maid plána dasa mo artistat besset sisa festiválabáikái čiegusin ja oidnokeahttá.

– Mo AKKIL guosseartisttaiguin galget lihkostuvvat doallat anonymitehta lávddis, dan eat dieđe. Muhto sáhtán goitge namuhit ahte sus leat beakkán sámi artisttat fárus, loahpaha suollemas Reinås Nilut.

AKKIL boahtá Márkomeanu lávdái lávvordaga gaskaija.