Vearroetáhtta lea sádden maŋimuš vearroloahpparehkegiid 2022 ovddas. – Mii leat hárve dahje eat goassige ovdal oaidnán nu stuora loguid vearu oktavuođas mii olbmuin lea buorrin, lohká divišuvdnahoavda.
2,9 miljovnna olbmo ožžot ruovttoluotta 44,8 miljárdda ruvnno, dieđiha Vearroetáhtta preassadieđáhusas. Dat lea measta 15 miljárdda kruvnno eanet go ollislaš submi seamma áiggis diibmá.
Njukčamánu 14. beaivvi rájes lea Vearroetáhtta sádden badjel 5,2 miljovnna vearrodieđáhusa. Gaskaboddosaš logut čájehit ahte sis geain lea ruhta buorrin, ožžot 15 200 ruvnno gaskamearálaččat.
Sullii 900 000 olbmo orrot oažžumin bázahusvearu oktiibuot 27 miljárdda ruvnno ovddas. Gaskamearálaččat šaddet máksit 29 810 ruvnno, mii lea mealgat unnit go ovddit jagi, muhto veaháš eambbo go maŋemus jagiid dábálaččat. Jagi 2021 šadde sii geat ožžo bázahusvearu máksit ruovttoluotta gaskamearálaččat 43 500 ruvnno. (©NTB)
