– Njihttit geahččalit fas
De leat vuot njihttit geat dahkaluddet sii leat Vearroetáhta, geahččaleamen dájuhit norgalaččaid.
Jahkásaččat go Vearroetáhta sáddegoahtá vearrodieđáhusa olbmuide, de sáddegohtet njihttit maid ártegis e-poasttaid olbmuide, dájuhan dihte olbmuid iešguđet láhkai.
Skatteetaten dahje Vearroetáhta deattuha preassadieđáhusas ahte sii eai sádde liŋkkaid e-poasttas dahje sms:s, eai ge jeara báŋko- dahje kredihtakoarttadieđuid dáin kanálain. Buot gulahallan Vearroetáhtain dáhpáhuvvá Altinnas dahje dan ruovttusiiddus.
– Don oaččut e-poastta Vearroetáhtas go vearrodieđáhus lea gárvvis ja mii bivdit ahte don ieš ohcalat min neahttasiidduid ja logget sisa das, lohká Vearroetáhta sihkkarvuođadirektevra Ragna Fossen.
Son muitala sii vásihit jahkásaččat ahte vearromáksit vásihit njihttingeahččalemiid dehálaš vearrobeivviid. Dat dahko erenoamážit e-poasttaid bokte man ulbmil lea dájuhit olbmuid deaddilit liŋkkaide man bokte njihttit ožžon vearromáksiid dieđuid maid maŋŋá sáhttet geavahit njihttimis dahje ID-suoládeapmái.
– Dát dájuheapmi gohčoduvvo phishing Norggas ja máilmmiviidosaččat. Lihkus lea olbmuid áicu, eahpádus ja gelbbolašvuohta buorránan mealgat. Njihttit geahčalit eará vugiin dájuhit olbmuid ja olbmot fillehallet deaddilit liŋkka maid eai livčče galgan, čilge Fossen ja lohká sii váidet buot dáid njihttiimiid.
Rávvagat amas dájuhuvvot:
Vearroetáhta ávžžuha dárkkistit gii lea sádden e-poastta. Buohtastala čujuhusa albma e-poasttaiguin/sms:in.
Iskka maiddái leago buorre giella vai stávenmeattáhusat. Skealmmat leat čehppon áđđestallat. Smiehtas moddii jus e-poasttas dahje sms:s bivdet du addit hearkkes dieđuid, kontonummara dahje sihkkarvuođakoda. Ale raba mildosiid amas olbmuin, ale deaddil liŋkkaid smiehtakeahttá ja čále ieš interneahtačujuhusaid neahttalohkis, ávžžuha Vearroetáhta. Erenoamážit lea álki dan dahkat giehtatelefovnnain. Jus eahpidat, dárkkis Skatteetaten.no dahje čuojat midjiide telefovnna nummiris 800 80 000.
