Gerlinde Thiessen muitala iežas bisánan máŋganuppelohkái geardde luoddaguoras, dan ovtta tuvrras, Álttá ja Guovdageainnu gaskkas čoaggileame ruskkaid, ja sus ledje ollu ruskkat gártan mátkkis. Ruskkat maid olbmot leat bálkon luoddagurrii.
Gerlinde Thiessen muitala iežas bisánan máŋganuppelohkái geardde luoddaguoras, dan ovtta tuvrras, Álttá ja Guovdageainnu gaskkas čoaggileame ruskkaid, ja sus ledje ollu ruskkat gártan mátkkis. Ruskkat maid olbmot leat bálkon luoddagurrii.
– Mun dahken ieš iskkadeami mannan vahkku go vudjen Álttás Guovdageidnui. Mun bisánin 15 geardde ja čoggen ruskkaid mat ledje luoddaguoras, muitala Gerlinde Thiessen, gii orru Guovdageainnus.
Plastihkka lea vearrámus
Ruskkaid gaskkas leat guoros bohttalat, skuovat ja biilaávdnasat.
– Orrot guoros energiijajuhkosat. In namut nama juhkosis, muhto dat dahká du gievran. Juobe nu gievran ahte soames nagoda rahpat láse biillas ja šlivget dan olggos, leaikkastallá Gerlinde Thiessen.
Gerlinde mielas lea váivi go ruskkat leat juohke sajis, erenoamážit báikkiin gos lea álki bisánit.
– Plastihkka lea buot vearrámus mii lea luonddus. Doppe gos leat plastihkkadiŋggat, doppe eai leat muorjjit eai ge jeahkálat. Eallit mat geahččalit oažžut bázahusaid olggos doasain, jápmet go plastihkka darvána čoavjái, čilge Thiessen.
Luondu ii dárbbaš min
Gerlinde Thiessen muitala iežas oahppan doalahit meahci čorgadin go lea fitnan luonddus, ii ge ipmir manne muhtimat nuoskkidit birrasa dáinna lágiin.
– Jus oaččun muhtima dáinna čalmmustahttimiin jurdilit nuppes ovdal go bálkesta ruskka lundui, vaikko lea ge biillas, de livččii dat hirbmat buorre. Dat bávččagahttá mu go oainnán nu ollu plastihka luonddus. Measta juohke háve go lean finadan luonddus, de lean čoaggán ruskkaid maid earát leat bálkestan, muitala Gerlinde Thiessen Ávvirii, ja lasiha:
– Mii dárbbašit luonddu. Luondu ii dárbbaš min.
