Sámediggeráđđi juolluda 450 000 ruvnnu prošeaktadoarjjan Hørselshemmedes Landsforbundii (HLF) nannet veahkkebálvalusa sámegielagiidda geain leat hástalusat guluin.
Prošeavtta áigumuš lea loktet máhttodási sámegielagiid gulu birra ja dan láhkai váikkuhit dasa ahte eanet sápmelaččat geain leat hástalusat guluin ožžot dan veahki ja heiveheami masa sis lea vuoigatvuohta.
Dat ahte diehtojuohkin ja bagadus lea fidnemis sámegillii, lea deaŧalaš vai uhccot dat gulahallanváttisvuođat mat sápmelaččain leat go sis lea oktavuohta almmolašvuođain.
– Stuora dárbu
– Stuorra dárbu lea eanet gelbbolašvuhtii gullufuolahusas sámi geavaheddjiid várás. HLF galgá álgoálgosaččat fátmmastit olles Norgga álbmoga, muhto ain leat dál uhccán dieđut gulu birra sámegillii, dadjá sámediggeráđđi Hans Ole Eira preassadieđáhusas.
Sámediggeráđđi čállá ahte gulluhástalusat lea dearvvašvuođahástalus, mas sáhttet leat stuorra váikkuhusat bargoeallimii, sosiála eallimii ja álbmotdearvvašvuhtii oppalaččat. Ollu sámi gulluvádjigat livčče sáhttán bargat guhkit, oassálastit eanet servodateallimii ja vásihit buoret dearvvašvuođa jus sii livčče ožžon hálddašankurssa alcceseaset ja iežaset oapmahaččaide das lahka gos sii ásset, ja áinnas deaivvadeamis dearvvašvuođa- ja fuolahusbargiiguin geain lea gullugelbbolašvuohta.
Diehtojuohkinbargu sámegillii
Diehtojuohkin ja bagadeapmi galgá leat fidnemis sámegillii vai uhccot gulahallanváttisvuođat go sápmelaččain lea oktavuohta almmolašvuođain. Dan oktavuođas lea giella- ja giellanannensuorggis deaŧalaš nannet diehtojuohkima, máhtu, iešguđet kursaprográmmaid ja eaktodáhtolaččaid rekrutterema.
– Deaŧalaš lea oažžut buori diehtojuohkima iežas eatnigillii, ja ahte leat muhtumat geaiguin beassá ságastit iežas gulluhástalusaid birra, oažžut veahki ja cavgilemiid das mo hálddašit iežas árgabeaivvi, oažžut veahki dasa mo galgá geavahit ja dikšut bealljeapparáhtaid ja oažžut veahki dasa mo galgá háhkat máhtu dan birra masa sus lea vuoigatvuohta ja mo dádjadit vuogádagas, dadjá sámediggeráđđi Hans Ole Eira.
