-Almmuhus-
OĐĐASATVeahke­hit nuoraid fámui­duhttit nubbi nuppi

Veahke­hit nuoraid fámui­duhttit nubbi nuppi

-

-

Sámiráđđi lágida golbma webinára sámenuoraide birasáššiid birra. Jurdda lea láhčit deaivvadanbáikki gos sámenuorat sáhttet fámuiduhttit nubbi nuppi.

— Sámis mii vásihat johtilis dálkkádatrievdama ja min uhkida lassánan industrialiseren. Riikarájáid rastá mii vásihat seamma sullasaš áššiid. Sámiráđđi háliida bovdet sámenuoraid golbma oanehis bargobádjái buktit sin oainnuid iešguđetlágan prošeavttaide mat leat jođus Sámiráđis, čállá Sámiráđđi sin neahttasiiddus. 

Oahppat registreret dieđuid

Sámiráđđi čilge ahte vuosttaš bargobádji lea CLEO bargoneavvu birra. Dat lea reaidu mainna sáhttá registreret dieđuid das mii iežas birrasis dáhpáhuvvá. Dát bargoneavvu lea beaggán Alaskas ja lea geavahuvvon eanemusat dálkkádatrievdama áicamii. Webinaras digaštallet sáhttitgo mii geavahit dán bargoneavvu Sámis. 

Ruskkaid hálddašeapmi

– Nuppi bargobáji fáddá lea ruskkaid hálddašeapmi ja plastihkka ruskkat. Sámiráđđi háliida juohkit dieđuid min prošeavttas ruskkaid hálddašeames Guoládatnjárggas. Lágideaddjit čilgejit ahte gažaldat lea sáhttitgo geavahit dán prošeavtta dieđuid maiddái eará guovlluin Sámis.

Birasváttisvuođat miehtá Sámi 

Lágideaddjit muitalit ahte goalmmát ja maŋemus bargobájis šaddá sáhka birasváttisvuođaid birra miehta Sámi.  — Mii háliidat bovdet nuoraid servviid miehtá Sámi juohkit dieđuid das man birra sii leat bargamin ja maid Sámiráđđi sáhtášii bargat álkidahttin dihte sámenuoraid ovttasbarggu riikka rájáid rastá, čállá Sámiráđđi.

Bargobájit lágiduvvojit ođđajagimánu ja guovvamánu 2021:s. 

-Almmuhus-