-Almmuhus-
-Almmuhus-
OĐĐASATVeahkehit mánáidgárde­bargiid šaddat sáme­gielagin

Veahkehit mánáidgárde­bargiid šaddat sáme­gielagin

Journalista

-

-

Sámediggi lea lágidan fágaseminára mánáidgárdebargiide geat leat mielde nuvttá sámegiel mánáidgárdeortnegis.

 Seminára lágiduvvui Álttás maŋŋebargga ja gaskavahku, ulbmil seminárain lei addit gelbbolašvuođaloktema mánáidgárdebargiide vai sii besset viidáset ovdánahttinbargguin.

– Sámediggi lea bidjan johtui nuvttá sámegielat mánáidgárdeortnega vai veahkehit mánáidgárdebargiid šaddat sámegielagin golmma jagi sisa. Dakkár barggu ii leat oktage ovdal dahkan, ja mii gállit ovttas ođđa bálgáid. Mánáidgárddit barget iežaset sámi giella- ja kultuvra vuolggasajis, nu go mánáidgárddiid rámmaplána gáibida. Go mii bargat sámegielaid nannemiin, de mii bargat čieža buolvva perspektiivvas, dadjá sámediggeráđđi Mikkel Eskil Mikkelsen (NSR) dieđiha Sámediggi Facebookas.

Seminára fáttát ledje movt bargat gievrras giellamodeallaiguin, jođiheapmi sámi mánáidgárddis, dekoloniseren, movt rievdadusbarggut váikkuhit bargiide, diehtomielalašvuohta sámáidahttima olis, ja movt movttiidahttit mánáidgárdebargiid árgabeaivvis áŋgiruššat oahpahit sámegiela mánáide.

-Almmuhus-