-Almmuhus-
KULTUVRAVeahkehit mánáid doalahit lohkanmovtta olles geasi

Veahkehit mánáid doalahit lohkanmovtta olles geasi

-

-

Geasset lágiduvvo digitála lohkankampánja mánáide geat vázzet 1.-7. luohkain miehtá Norgga.

Lohkankampánja «sommerles.no» lea álggahuvvon vai mánáid movttiidahttet lohkat go ieža háliidit. Galgá leat somá searvat, ja mánát besset geassebotta doalahit lohkančehppodaga guhkes luomus.

Mánáin ferte leat iešráhkaduvvon profiila sommerles.no siiddus.

 

Skeaŋkkat mánáide

Finnmárkku girjerádjosa bargit doaimmahit «sommerles.no». Sii čuvvot mielde neahttasiiddus ja dollet oktavuođa mánáiguin neahttasiiddu bokte.

Juohke nuppi vahkku almmuhit ođđa čoavddasáni maid mánát fertejit viežžat girjerádjosis. Kampánjjas leat ceahkit maid goargŋu dađistaga go lohká girjjiid, ja mánát sáhttet skeaŋkkaid oažžut go gorgŋot alit ceahkkái.

 

Ieš dieđihat ja čoakkát čuoggáid

Geassekampánja bistá geassemánu 1. beaivvi rájes gitta borgemánu 31. beaivvi rádjái.

Sommerles.no siiddus sáhttá dieđihit makkár girjjiid lohká, čuoggáid čoaggit, oažžut fiinna skeaŋkkaid ja lohkanrávvagiid, lohkat sommerles-muitalusa, čoavdit bargobihtáid ja oaidnit makkár girjjiid du olbmát lohket.

 

Nuppes lágiduvvo

Dál lea nuppes go lágiduvvo dákkár kampánja Finnmárkkus.

Diibmá ledje golbma girjerádjosa geahččalanortnegis mielde. 268 máná serve Mátta-Várjjagis, Láhpis ja Čáhcesullos.

Sii lohke oktiibuot 2511 girjji, ja 389 452 siiddu, muitalit lágideaddjit preassadieđáhusas. Neahttasiiddus gávnnat guđe girjerádjosat leat mielde kampánjjas.

-Almmuhus-