-Almmuhus-
OĐĐASATVeahkaválddálaš­vuohta lassá­na basiid áigge 

Veahkaválddálaš­vuohta lassá­na basiid áigge 

-

-

Okta logi olbmos dovdá soapmása gii lea vásihan veahkaválddálašvuođa juovlabasiid.

 Dan čájeha varas iskkadeapmi man Vold- og overgrepslinjen (VO-linjen) lea čađahan. 

– Dat leat váivves, muhto eai vuorddekeahtes bohtosat, lohká  VO-linjen prošeaktajođiheaddji Julie Haatuft preassadieđáhusas. Son lohká ahte dan dadjá go son diehtá veahkaválddálašvuohta ruovttuin lassána basiid áigge, earret eará alkoholageavaheami geažil ja go ellet nu «badjálagaid» ruovttus. 

– Danne lea ge dehálaš diehtit gos sáhttá oažžut veahki, lohká Haatuft.  

Eai dieđe gos sáhttá veahki oažžut

Dađi bahábut čájeha seamma iskkadeapmi ahte 38 proseantta jerron olbmuin eai dieđe gos lea veahkki olámuttos jus ieža dahje earát geaid sii dovdet vásihit veahkaválddálašvuođa. 

– Dat lea vuorjašuhtti ja dan berre veahkkeapparáhtta atnit duođalažžan. Danne lea dehálaš deattuhit ahte VO-linjen lea buohkaid várás. Sihke sin ovddas geat ieža leat vásihan veahkaválddálašvuođa dahje oapmahaččaide. Mii leat buohkaid váste ja geahččalit veahkehit ja bagadallit dan mielde makkár hástalusat olbmuin leat, lohká Haatuft. 

Loga maid:
Gergo­sat veahke­hit olbmuid geat ráhčet juovllaid áigge

Lassána roassoáiggiid 

Julie Haatuft lohká ahte veahkaválddálašvuohta lagasoktavuođain lassána roassoáiggiid.  Dan lohká oaidnit raporttain miehtá máilmmi ahte dakkár dilálašvuođas lassána veahkaválddálašvuohta, earret eará go šaddet orrut isolašuvnnas ruovttuin. 

– Dat ii guoskka dušše juovlabasiide, muhto maiddái muđui. Mii eallit roassodilis ja oallugat leat fuolastuvvan ja dovdet dorvvuhisvuođa. Dasa lassin lea friddjavuohta vánddardit gáržžiduvvon pandemiija geažil. Dat sáhttá máŋgga ruovttus dagahit riidduid, suhtu ja veahkaválddálašvuođa. Danne lea dál deháleabbo go goassege ovdal čuovvut mielde mii dáhpáhuvvá du birrasis. Dieđit jus várohat ahte muhtun vásiha veahkaválddálašvuođa, lohká Haatuft. 

Mii lea VO-linjen

VO-linjá tlf. 116 006

Vold- og overgrepslinjen lea veahkketelefovdna olbmuide geat vásihit veahkaválddálašvuođa ruovttus dahje eará lagasoktavuođain.

VO-linjái sáhttá riŋget vaikko goas. Doppe leat birra jándora olbmot geat vástidit ja astet gullat du hástalusaid, addit ráđiid ja bagadallama. Don beasat leat anonyma ja bálvalus lea nuvttá.

Gáldu: www.volinjen.no

-Almmuhus-