– Veahkaválddálašvuohta lea servodatváttisvuohta mas buohkain lea ovddasvástádus, muhto mii dárbbahit čielga jođiheami ja ambišuvnnaid go galgá bargat stuora servodathástalusaiguin, čállet Guovdageainnu suohkanpolitihkkarat dán lohkkiidreivves.
Ráhkis guovdageaidnulaččat. Ráhkis olbmot.
Guovdageainnus galget buohkat leat oadjebasat.
Buohkat geat dáppe orrot, barget, studerejit ja fitnet guossis.
Vuosttaš lávki čoavdit váttisvuođa lea dovddastit hástalusa ja duohtavuođa.
Ja mii lea duohtavuohta? Mat leat min hástalusat?
Sihke logut ja olbmuid vásáhusat veahkaválddálašvuođain čájehit ahte min servodagas dáhpáhuvvá veahkaválddálašvuohta.
De fertet jearrat alddámet:
Háliidit go mii ahte min suohkanis galgá leat dakkár dilli?
Bargat go mii doarvái eastadit dán dili?
Mii fertet dainna bargat searvalaga. Veahkkálaga. Ja mii politihkkarat fertet leat njunnošis.
Mii leat ožžon hui olu buriid ja dehálaš rávvagiid dáid beivviid álbmogis.
Ja mii leat hui giitevaččat.
Guovdageainnu johttisápmelaččat listu (JSL), Guovdageainnu Sámilistu (GSL), Guovdageainnu Árja ja Guovdageainnu Olgeš suohkanstivrra ovttasbargojoavku «Verddevuohta» leat fuolastuvvan lohkat ášši mii almmuhuvvui NRK:s (Guovdageainnus lea juoga – NRK Sápmi) ja mii das boahtá ovdan.
Mii giitit Kátjá Rávnná, gii rahpasit lea muitalan su vásáhusaid i birra maid son lea vásihan Guovdageainnus. Dan maid Kátjá lea vásihan Guovdageainnus ii leat dohkálaš, ii ge galgga dáhpáhuvvat min servodagas. Verddevuođajoavku oaivvilda ahte lea suohkana ovddasvástádus leat mielde eastadit veahkaválddálašvuođa ja politihkkarat fertejit leat njunnošis dan barggus.
Verddevuođa ovttasbargošiehtadusas boahtá ovdan ahte áigut dán áigodaga bargat viidásit earret eará «Oadjebas Guovdageainnus» prošeavttain, mii lea fágaidrasttildeaddji bargu man Guovdageainnu suohkandoavttir lea álggahan mas veahkaválddálašvuođa lea dehálaš fáddán.
Dát lea servodathástalus man min verddevuođajoavku oaidná duođalažžan ja vuoruha. Mii rámidit min suohkandoaktára gii jođiha «Oadjebas Guovdageainnus» barggu, ja mii oaivvildit ahte dál lea áigi ahte politihkkarat servet bargui.
Duorastaga galgá suohkandoavttir ovdanbuktit «Oadjebas Guovdageainnus» barggu suohkanstivrii. Barggus lea fokus eastadanbargu ja guottuid rievdademiin, dan rájes go mánná lea čoavjjis gitta rávisolmmožin. Bargu galgá fátmmastit buot beliid servodagas maid olmmoš deaivvada eallimis.
Veahkaválddálašvuohta lea servodatváttisvuohta mas buohkain lea ovddasvástádus, muhto mii dárbbahit čielga jođiheami ja ambišuvnnaid go galgá bargat stuora servodathástalusaiguin. Mii oaivvildit ahte dá lea bargu masa mii dárbbahit olles servodaga searvá.
Mis leat vuordámušat dan čuovvoleapmái, ja lohpidit jođihit barggu. Mii fertet fárrolaga bargat guottuid rievdademiin, ja gálgat min servodaga hástalusaid. Dušše dalle nákcet rievdadusaid oažžut.
