Mannan ija leat moadde doarruma váidon Finnmárkkus, liikká lohket politiijaid bealis jaskes idjan leamašan.
Mannan ija leat moadde doarruma váidon Finnmárkkus, liikká lohket politiijaid bealis jaskes idjan leamašan.
Mannan ija leat politiijat dieđihan máŋga dáhpáhusa gárrenolbmuid birra.
Finnmárkku politiijaguovllu operašuvdnajođiheaddji Lars Rune Hagen, goittot ge ii loga dán vearrábun go muđuid lávejit vahkkoloahpat.
– Lea leamaš oalle jaskat, nu mo lávejit vahkkoloahpat, dadjá son.
Doarrumat
Politiijat goittotge leat dieđihan moadde doarruma mannan ija.
Muhtin priváhtadálus Čáhcesullos galgá leat leamaš veahkaválddálašvuohta, ja muhtimis galgá leat ámadadju bávččagan go galgá leat čorbmaduvvon, dán birra dieđihedje váile golmmas iđđesija.
Politiijat dutket ášši viidásat.
Maiddái Hammerfeasttas dieđihit politiijat leamaš doarruma olggobeale muhtin olgobáikki, dán birra dieđihedje badjelaš golmmas iđđesija.
Dás galgá leamaš sáhka čorbmamis, čiekčamis ja oivviin boŋkaleames nuppi vuostá.
– Okta olmmoš sáddejuvvui doaktáriskosii, ja goappašagat gohččojuvvuiga guođđit gávpotguovddáža, dieđihit politiijat.
– Doddjon njunni
Operašuvdnajođiheaddji muitala goappašat áššiid leat váidon.
– Čáhcesullo dáhpáhus lei muhtin priváhtadálus gos ledje máŋggas báikkis go doarrun dáhpáhuvai, čilge son.
Hammerfeasttas ledje ge guovttis doarrán, su dieđuid mielde.
– Ii oktage leat garrasit roasmmehuvvan dáid geažil, muhto Čáhcesullo-dáhpáhusas lea jáhkkimis ovttas doddjon njunni, muitala son.
Eará dáhpáhusat mannan ija
Girkonjárgga politiijat šadde earret eará fitnat hoteallas go doppe lei muhtin badjelmeare gárremin.
– Politiijat veahkehedje albmá seŋgii, dieđihedje politiijat váile ovttas.
Álttás ges politiijat maiddái mannan ija dieđihedje lobihis mopedavuodjima birra. Sidjiide lea dieđihuvvon ahte leat oainnahallan mopedat main eai leat čuovggat eai ge šilttat, ja mat vudjet varalaš ládje.
Guovdageainnus galgá maid leat leamaš lobihis vuodjin mannan ija, doppe leat politiijat čuohppan eret galbbaid muhtin biillas.
Badjelaš ovttas ihkku, dieđihedje politiijat ges ahte leat muhtin gárren vuolleahkásačča šaddan lágidit su váhnemiid háldui.
Maiddái Girkonjárggas galget leat leamaš eambbo gárrenolbmot.
Váile beal guovttis ihkku dieđihedje politiijat ahte leat šaddan mielde váldit muhtin nieidda Girkonjárgga gávpotguovddážis, guhte galgá leat leamaš badjelmeare gárremin.
– Son dolvojuvvui doaktáriid lusa, iskan dihte dárbbaša go veahki čielgat, dieđihit politiijat.
Beal golmma áigge iđđes ija, dieđihedje ges politiijat ahte leat váidán muhtin albmá Hammerfeasttas.
– Son ii doahttalan politiijaid gohččuma guođđit gávpotguovddáža, dieđihedje politiijat.
Sii čállet maid ahte leat váidán albmá dán geažil.
