Dávgevári njoarostangilvvus vuittii 2013 NM-measttir njoarosteames ja Skuohtanjárgga boazodoalli Nils máhtte R. Eira njealjejuvllaga.
Dávgevári njoarostangilvvus vuittii 2013 NM-measttir njoarosteames ja Skuohtanjárgga boazodoalli Nils máhtte R. Eira njealjejuvllaga.
63 oasseváldi ledje searvan mannán vahkkoloahpa njoarostangilvui Dávgeváris, Avvilis guhtta miilla lulás, Davvi-Suomas, máid máŋggas namuhit «dat stuorimus njoarostangilvu». ii leat nu imáš, go leat issoras olu njoarosteaddjit geat servet dan gilvui, sihke Norgga- ja Suomabeale, ja vuoittu lei njealjejuvllat. 32 njoarosteaddji besse loahppagilvvuide mii lei sotnabeaivvi.
Vuittii geahppasit
Lei Norgga sápmelaš ja Skuohtanjárgga boazodoalli Nils Mahtte R. Eira gii loahpas vuittii njealjejuvllaga. Son lei loahppagilvvus Lákkonjárgga boazodolliin Johan Isak Eirain, ja vuittii nu ii dárbbašan njoarostit šat nuppes.
– Dat galgá čehppodat ja maid veahá lihkku go njoarostan gilvvu galgá vuoittit. Mus láve váttis beassat rátkkaoasis viidáset, muhto go das beasan viidáset, dalle mun láven buoret ja buoret šaddat. Mun šattan mentálalaččat nannoset mađi guhkkelii gilvvus beasan, goit njoarosteames, muitala Nils Máhtte.
Nils Máhtte R. Eira lea ge maid vuoittán NM-gilvvu njoarosteames Romssas, mii lea Norggabeale dat stuorimus gilvu oasseváldit dáfus, ja mannan dálvvi vel Anáris Gonagasgilvvuid oktavuođas.
Ii vuos mearridan
Eira muitala ahte son ii leat vel mearridan máid dahká njealjejuvllagiin máid vuittii.
– Lean ipmirdan ahte dát njealjejuvllat ii leat «typegodkjent», dahje dohkkehuvvon Norggas vuoddjit, nu go dál lea. Mun in leat sihkar movt de šaddá báberhommáin, ferten dál moatti beaivve geahčen mearridit, go lean vuos iskkat movt lea, lohká son.
Boahtte jagi vel stuorit
Jođiheaddji Taiga festiválas, Marko Touro, lea duhtavaš gilvvuin. Son muitala ahte sii livčče háliidan vel eambbosiid searvat, ja sávvet ollašuhttit dan boahtte jahkái.
– Diehttelas šaddá gilvu boahtte jagi maid. Eat dieđe vuos šaddá go vuosttaš vai nuppi vahkkoloahpa geassemánus, muitala son, ja joatká:
– Mis livččii sadji birrasiid 100 oasseváldi váldit vuosttá gilvvuide, ja dan mii háliidit bargat ollašuhttit boahtte jagi.
Musihkka ja teáhter
Njoarostangilvu lea okta oassi Taiga festiválas, mii lea Dávgeváris. Doppe lea sihke musihkka ja teáhter leamašan váhkoloahpas.
– Ledje birrasiid 400 geahčči geat fitne festiválas dán vahkkoloahpa. Boahtte jagi mii áigut maid Norggabeale sámi artisttaid bovdet deike čuojahit. Mun jáhkán dát festivála boahtá šaddat stuorit jagis jahkái, lohká son loahpas vel.
Festiválas čuojahedje ge earret eará Somby, Amoc, Tiina Áikio ja Ravggon.
