Ráđđehusa mearrádus mieđihit ođđa teáhtervistti Sámi Našunálateáhter Beaivvážii ovttas Sámi Joatkka- ja Boazodoalloskuvllain illudahttá stivrajođiheaddji.
– Odne lean nu ilus ja giitevaš! Dán mearrádusa leat vuordán nu guhká. Dá lea sámiid oktasašvuoitu, mii manná maŋás guvlui Álttá Guovdageainnu eanu dulvadanášši rájes, ja sámi ealáskahttima bokte gitta otnážii. Oallugiin lea oassi dán vuoittus, lohká stivrajođiheaddji Lene Hansen preassadieđáhusas.
Stivrajođiheaddjis lea stuora doaivu
Ovttastit vistti sámi joatkkaskuvllain lea gelddolaš ja rahpá ođđa ovttasbargovejolašvuođaid. Lene Hansena mielas lea otná mearrádus hui mávssolaš Sápmái, muhto maiddái Norgga kulturnašuvdnii.
– Ođđa visti mearkkaša hui ollu sámegillii, identitehtii ja diehttelasat lávdedáidagii. Hui váttis bargodilálašvuođas leat min dáiddárat šaddan buvttadit earenoamáš dáidaga miehtá riikii. Mii leat vuoitán máŋggaid bálkkašumiid, dál galgat faŋuhit vel guhkkelii, lohka Hansen.
Beaivváža stivra cealká ahte lea guhkes listu sis guđet leat oassin dás:
– Vuosttažettiin buot bargit, guđet leat máŋggaid logenár jagiid šaddan bargat dákkár visttiin maid Bargobearráigeahčus lea áigon giddet máŋgii. Sii eai leat goassege vuollánan. Sii leat dahkan veadjemeahttuma vejolažžan.
Muđui háliidan giitit iežamet teáhterhoavddaid Beaivváža álggu rájes. Dasa lassin lea nu earenoamáš ovttasbargat sihke sámediggepresideanttain ja ráđđelahtuin Henrik Olseniin ja politihkalaš jođihangottiin. Sii leat min ovdavázzit, dadjá Lene Hansen vel loahpas.
