Nu lohká Johan Thomas H. Hætta dan dovddu birra maŋŋil go bážii vuosttaš ealgga. Dáinna son vuorbáduvvui ge maid vahku vuoitin min ealgabivdogilvvus.
Nu lohká Johan Thomas H. Hætta dan dovddu birra maŋŋil go bážii vuosttaš ealgga. Dáinna son vuorbáduvvui ge maid vahku vuoitin min ealgabivdogilvvus.
Mannan maŋŋebárgga bážii Johan Thomas Holmestrand Hætta ealgga Šuolggajogas, mainna searvvai Ávvira ealgabivdogilvui, dáinna vuorbáduvvui maid vahku vuoitin.
– Mii leimmet poasttas čohkkámin go beana fáhkka manai ja jávkkai ieš áiggiid. Mii oaidnit beatnaga čađat GPS-rusttegis ja gullat dat ciellá. De oaidnit ahte dat boahtá njuolgga min poastta guvlui. Dat buvttu ealgga gitta postii ja mun de bessen báhčit dan, nu máinnasta Johan Thomas dan birra.
Vuosttaš ealga
Son ii loga iežas ovdal báhčán ealgga.
– Ii leat juohke jagi heiven nu ahte beasan vuolgit bivdui. Dasa lassin galgá vel veaháš lihkku, ii olmmoš sáhte dušše lohkat dál manan bivdui ja bážán ealgga, čilge son.
Holmestrand Hætta ii loga máhttit iežas čilget maid dovddai go bážii ealgga.
– Dan lea váttis sániiguin čilget. Váibmu dearpá, adrenaliidna pumpe. Muhto dat lei somá go viimmat ravggai, muitala son.
Ealga dettii 144 kilo.
Ii leat viimmáskan dan dihte
Vaikke lei ge vuosttaš ealga, ja erenoamáš dovdu de ii mieđit iežas gal viimmáskan.
– In mun sáhte lohkat viimmáskan gal, lean álot liikon bivdit ja guolástit. Muhto lei erenoamáš somá báhčit ja somá oaidnit ahte beana doaibmá. Oaidnit ahte go manná de doppe lea juoga, ii mana summal, čilge Johan Thomas.
Son rámida beatnaga mii lea sin bivdojoavkojođiheaddji Ole Salomon Hætta beana.
Ovddit vahku vuoiti: – Stuorámus ealga maid goassege lean báhčán
Searvva don ge!
Ávvir sávvá lihkku Johan Thomasii, ja jus don háliidat searvat de gávnnat gilvvu dáppe.
Mii vuorbádat vahkkosaččat muhtima guhte vuoitá Ávvira t-báiddi, Ávvira ealgabivdi gaibagahpira ja mátketelefonveaskku man Finnmárkkuopmodat FeFo lea skeŋken gilvui.
Gilvu bistá golggotmánu 31. beaivái, dan maŋŋil vuorbádat váldovuoiti, vuoitun lea 5000 ruvdnosaš skeaŋkakoarta.
Losimus ealgga ovddas oažžu ges Ávvira ealgagonagas dahje -dronnet gaibagahpira.
