-Almmuhus-
-Almmuhus-
-Almmuhus-
OĐĐASAT– Váttis birget 75 heakkain jus ii váldde liigebarggu

– Váttis birget 75 heakkain jus ii váldde liigebarggu

-

-

Sis-Finnmárkku diggegotti áššedovdi Ingrid Mari-Anne Skum Gaup čilgii diggái iežas raportta mas geassá ovdan ahte Jovsset Ánte Sarai lea váttis birget 75 heakkain, jus ii váldde liigebarggu eará sajis.

Skum Gaup maiddái dajai dikkis go vihtanušai, ahte seammás lea váttis olahit buvttadangáibádusa mii lea 50 000 kruvnna.

– Lean gávnnahan ahte eavttut, mat leat bargat ja jođihit 75 heakkain, de oainnán váttisvuohtan olahit gáibádusa, go vuođđun oažžut doarjaga lea 50 000 kruvnna, lohká Gaup dikkis. Son joatká čilgemis ahte sáhttá dieđusge vuovdit eambbo, muhto dan ferte árvvoštallat jagis jahkái. Dálkkádat maid mearrida boazodoalu.

 

2011/12 jagit vuođđun

Áššedovdi lea geavahan jagi 2011/2012 vuođđun go oaidná dan mii lea lagamusas dálá duohtavuođa, go galgá doaimmahit ovttas iežas orohagain.

– Dalle čájeha vuovdinsupmi ahte olahivččii 30 000, iige olat 50 000, nu šaddá doaimmahit vuolláibáhcagiin, čilgii son dikkis ja lasiha ahte nubbi lea jus livččii nagodan vuovdit 50 000 kruvnna ovddas, de ii livčče vuolláibáza nu stuoris.

– Liikká livččii vuolláibáza. Go olggosgolut bohcco nammii leat sullii 1 700 kruvdna, lohká son dikkis.

 

Vuolláibáza

Ingrid Mari-Anne S. Gaup lea maid gávnnahan ahte vuovdin čájeha stuorra vuolláibáhcaga, de leat liikká golut vaikko livčče bohccuid mielde juohkán barggu.

– Olbmos lea alddis eará barggut, Jovsset Ánte Sara lea nuorra olmmoš ja aiddo álgán bohccuiguin. Boazodoalu vierru ja dáhpi lea ahte olmmoš berre leat ollu meahcis, go dalle oahppá, galgá ollu oahppat sosialiseret iežas birrasis. Nuorra olbmui lea dehálaš oažžut gelbbolašvuođa ja oassálastit bargguide, muhto jus lea beare ollu vuolláibáza, de ferte eará bargu váldit nu go son lea dahkan. Dat dieđusge sáhttá čuohcat boazobargguide. Sus ferte leat sihkkaris dienas eará sajis jus galgá sáhttit bargat bohccuiguin, muitala son dikkis.

– Nu unnán boazologuin ii leat vejolaš vehkiide fállat bohccuid, nu go vierru lea jus galgá ieš sáhttit birget. Boazodoallolágas čuožžu ahte ii sáhte biehttalit siesá atnimis bohccuid siidaoasis. 15. páragráfas daddjo ahte ovddit jođiheaddji galgá beassat leat siidaoasis, nu go lágas čuožžu, de ii oaččo okto atnit 75 heakka, čilgii Ingrid Mari-Anne Skum Gaup.

 

 

 

 

 

-Almmuhus-