-Almmuhus-
KULTUVRAVásihit Isac Elliot bileahttaváttisvuođaid

Vásihit Isac Elliot bileahttaváttisvuođaid

-

-

Sámi Musihkkafestivála buvttadeaddji Nils Johan Vars muitala iežaset vásihan teknihkalaš hástalusaid dál go vuvdet billeahtaid Isac Elliot konsertii.

 – Mis leat leamaš veaháš váttisvuođat bileahtavuovdimiin, muhto mii leat bargamin dainna dál, muitala Sámi Musihkkafestivála (SMF) buvttadeaddji Nils Johan Vars.

 

Bileahtat bohtet e-postii

Maŋimuš jándora lea Varsa telefuvdna čuodjan oalle jámma, bileahttaoastit dat riŋgguhit. Go olbmot leat oastán bileahtaid SMF neahttasiidduid bokte, de eai leat ožžon bileahta muhto dušše guitte.

 – Dál galgá dát njulgejuvvon, ja sii geat dál ostet bileahtaid gal ožžot maiddái bileahta iežaset e-poastaboksii, muitala Vars.

Maiddái sii geat leat ožžon guitte ožžot fargga bileahtaid e-postii.

 – Mun ávžžuhan buohkaid geat leat oastán bileahtaid, geahččat leat go ožžon bileahta dahje guitte, dat sáhttá maid gártan olbmuid ruskalihttái e-poasttas. Dáid beivviid mii sáddet maiddái bileahtaid sidjiide geat dušše leat ožžon guittiid, čilge Vars.

 

– Vuorddestehpet ovdal go riŋgebehtet

Buvttadeaddji muitala iežaset boahttevaš beivviid dieđihit go leat sádden bileahtaid buohkaide geat leat oastán daid, maiddái media bokte.

 – Nu ahte mun ávžžuhan olbmuid vuorddestit moadde beaivvi ovdal go váldet minguin oktavuođa. Jus eai leat ožžon bileahtaid e-postii maŋŋil go mii leat almmuhan ahte visot lea sáddejuvvon, de gal berrejit riŋget. Muhto dál čuodjá telefuvdna nu dávjá ahte eat astta bargat dáinna, dadjá Vars.

 

Measta bealli vuvdon

Váikke SMF leage vásihan hástalusaid de leat liikká bures jođihan bileahtaid.

 – Dál jándor maŋŋil leat birrasiid 500 bileahta vuvdon, dáinna leat duđavaččat. In jáhke mannat guhkit go vahkku ovdal buot leat jođihan, dadjá Vars guhte dattege lohká iežas áigut veahá buorebut vuovdalit.

 – Ferten veahá čeahpibut dieđihit ahte gos Isac Elliot bileahtat vuvdojit. Áiggun sosiála mediaid bokte čállit dán birra maid, dadjá son.

 

 

 

-Almmuhus-